Duleep Trophy Schedule : दुलीप ट्रॉफी कधी सुरू होणार? असं आहे संपूर्ण वेळापत्रक, रोहित-विराटमुळे उत्सुकता वाढली

फक्त जसप्रीत बुमराह आणि हार्दिक पांड्या यांना या स्पर्धेतून सूट देण्यात आली आहे. आता सर्वच मोठे खेळाडू खेळत असल्याने ही स्पर्धा कधी सुरू होणार हाही प्रश्न आहे. यात किती संघ सहभागी होतील आणि दुलीप ट्रॉफी २०२४ चे संपूर्ण वेळापत्रक काय आहे? याची उत्सुकता चाहत्यांना लागली आहे. चला तर मग या सर्व प्रश्नांची उत्तरे जाणून घेऊया.

५ सप्टेंबरपासून दुलीप ट्रॉफीला सुरुवात होणार 

यंदाची दुलीप ट्रॉफी ५ सप्टेंबरपासून सुरू होणार आहे. म्हणजे पुढच्या महिन्यात. तसेच, या स्पर्धेची सांगता १९ सप्टेंबर रोजी होणार आहे. 

यामध्ये ४ संघ सहभागी होत आहेत. इंडिया ए, इंडिया बी, इंडिया सी आणि इंडिया डी. 

भारताचे सर्व खेळाडू या ४ संघांमध्ये विभागले जातील. यावेळी वरिष्ठ खेळाडूही त्यात सहभागी होणार असल्याने नवीन आणि युवा खेळाडूंना संधी मिळण्याची शक्यता थोडी कमी आहे.

पहिला सामना भारत अ आणि भारत ब यांच्यात 

दुलीप ट्रॉफी २०२४ चा पहिला सामना भारत अ आणि भारत ब यांच्यात ५ सप्टेंबरपासून होणार आहे. त्याच दिवशी भारत क आणि भारत ड संघ देखील आमनेसामने येतील. 

यानंतर १२ सप्टेंबरला भारत अ आणि ड तसेच भारत ब आणि क संघ आमनेसामने येतील. 

१९ सप्टेंबरला भारत ब आणि भारत ड संघ एकमेकांना भिडतील, तर त्याच दिवशी भारत अ आणि भारत क संघदेखील आमनेसामने येतील. 

म्हणजेच दुलीप ट्रॉफीत प्रत्येक संघाला ३ सामने खेळावे लागणार आहेत. हे सामने ४ दिवसीय असतील. भारत आणि बांगलादेश यांच्यातील मालिका १९ सप्टेंबरपासून सुरू होणार आहे, तोपर्यंत हे सामने संपतील.

कोहली आणि रोहित दीर्घकाळानंतर दुलीप ट्रॉफी खेळणार

दुलीप ट्रॉफीच्या या ४ संघांमध्ये कोणता खेळाडू कोणत्या संघातून खेळणार हे अद्याप ठरलेले नसून, खेळाडूंच्या उपलब्धतेनुसार याचीही लवकरच घोषणा केली जाईल, अशी अपेक्षा आहे. 

भारतीय संघाचा माजी कर्णधार विराट कोहली २०१५ नंतर प्रथमच दुलीप ट्रॉफी खेळताना दिसणार आहे. तर कर्णधार रोहित शर्मा २०२१ सालापासून या स्पर्धेत खेळलेला नाही. अशा परिस्थितीत जेव्हा हे खेळाडू नव्या आणि  युवा खेळाडूंसोबत मैदानात उतरतील, तेव्हा त्यांनाही काहीतरी शिकायला मिळेल.