गुजरात-आरसीबीच्या फलंदाजांनी ४०३ धावा ठोकल्या, WPL च्या पहिल्याच सामन्यात विक्रमांचा पाऊस पडला

संपूर्ण सामन्यात दोन्ही संघांच्या गोलंदाजांची चांगलीच धुलाई झाली. वडोदरातील कोटंबी स्टेडियमवर फलंदाजांनी सहज धावा केल्या. त्यामुळे या सामन्यात विक्रमांचा पाऊस पडला. 

सर्वात मोठ्या लक्ष्याचा यशस्वी पाठलाग

महिला प्रीमियर लीगमध्ये सर्वात मोठ्या लक्ष्याचा यशस्वी पाठलाग करण्याचा विक्रम मोडला गेला आहे. मुंबई इंडियन्सने २०२४ मध्ये गुजरातविरुद्धचा सामना १९१ धावा करून जिंकला होता. आता २०० हून अधिक धावांच्या लक्ष्याचा पाठलाग करणारा आरसीबी WPLचा पहिला संघ ठरला आहे.

WPL Todays Match: आज मुंबई इंडियन्स आणि दिल्ली कॅपिटल्स भिडणार, अशी असू शकते दोन्ही संघांची प्लेइंग इलेव्हन

एका सामन्यात सर्वाधिक धावा

लीगच्या इतिहासात एका सामन्यात सर्वाधिक धावा करण्याचा विक्रमही मोडला गेला आहे. या सामन्यात दोन्ही संघांनी मिळून एकूण ४०३ धावा केल्या. याआधीही हा विक्रम याच दोन संघांच्या नावावर होता. २०२३ मध्ये ब्रेबॉर्न स्टेडियमवर गुजरात आणि RCB यांच्यातील सामन्यात ३९१ धावा झाल्या होत्या.

एका फलंदाजाचे सर्वाधिक षटकार

गुजरात जायंट्सची कर्णधार ऍशले गार्डनर हिची बॅट जोरदार बोलली. तिने ३७ चेंडूत ७९ धावांची तुफानी नाबाद खेळी खेळली. या ऑस्ट्रेलियन अष्टपैलू खेळाडूने तिच्या इनिंगमध्ये ८ षटकार ठोकले. यासह तिने एका डावात सर्वाधिक षटकार मारण्याच्या बाबतीत सोफी डिव्हाईनची बरोबरी केली.

लीगमधील चौथे जलद अर्धशतक

रॉयल चॅलेंजर्स बंगळुरूकडून ऋचा घोषने शानदार फलंदाजी केली. तिने केवळ २३ चेंडूत अर्धशतक केले. महिला प्रीमियर लीगच्या इतिहासातील हे चौथे जलद अर्धशतक आहे. २७ चेंडूत ६४ धावा करून ती नाबाद राहिली. ऋचाने षटकार मारून सामना संपवला.

सर्वात जलद ५०+ धावांची भागीदारी

गुजरातसाठी गार्डनर आणि डिएंड्रा डॉटिनल यांनी चौथ्या विकेटसाठी ६७ धावांची भागीदारी केली. या दोघींनी केवळ ३१ चेंडूंचा सामना केला. या काळात संघाची धावगती १२.९६ इतका होता. गुजरातसाठी लीगमधील ही सर्वात जलद ५० हून अधिक धावांची भागीदारी आहे.