Multibagger Stock : पाच वर्षांत १ लाखाचे ७५ लाख केले! दणदणीत कमाई करून देणारा हा शेअर आहे कोणता? वाचा!

गेल्या पाच वर्षांत एक्सप्रो इंडियाच्या शेअरमध्ये ७,४०० टक्क्यांहून अधिक वाढ झाली आहे. या काळात कंपनीचे शेअर्स १६ रुपयांवरून १२०० रुपयांपर्यंत वधारले आहेत. एक्सप्रो इंडियाच्या शेअर्सचा ५२ आठवड्यांचा उच्चांक १६७५.५५ रुपये आहे. तर, कंपनीच्या शेअर्सचा ५२ आठवड्यांचा नीचांकी स्तर ८६७.१० रुपये आहे.

हा शेअर १४ फेब्रुवारी २०२० रोजी १६.६३ रुपयांवर व्यवहार करत होता, तो आज १२४८.८० रुपयांवर पोहोचला आहे. गेल्या ५ वर्षात कंपनीच्या शेअर्समध्ये ७४०० टक्क्यांहून अधिक वाढ झाली आहे. जर एखाद्या व्यक्तीनं १४ फेब्रुवारी २०२० रोजी एक्सप्रो इंडियाच्या शेअर्समध्ये १ लाख रुपयांची गुंतवणूक केली असती आणि गुंतवणूक रोखून ठेवली असती तर या शेअर्सची सध्याची किंमत ७५.०९ लाख रुपये झाली असती. कंपनीनं देऊ केलेल्या बोनस शेअर्सचा यात समावेश नाही, बोनस शेअर्समुळं झालेली मूल्यवाढ लक्षात घेतल्यास हा परतावा आणखी मोठा असू शकतो.

हेही वाचा: तिमाही नफ्यात वाढ होताच रेल्वे कंपनीनं जाहीर केला डिविडंड, तुमच्याकडं आहे का शेअर?

२०२२ मध्ये दिले होते बोनस शेअर्स

एक्सप्रो इंडिया या कंपनीनं आपल्या भागधारकांना बोनस शेअर्स दिले आहेत. कंपनीनं जुलै २०२२ मध्ये १:२ या प्रमाणात बोनस शेअर दिले आहेत. म्हणजेच कंपनीनं प्रत्येक २ शेअरमागे १ बोनस शेअर वितरित केला आहे. गेल्या चार वर्षांत एक्सप्रो इंडियाच्या शेअरमध्ये ३३६० टक्के वाढ झाली आहे. १२ फेब्रुवारी २०२१ रोजी कंपनीचा शेअर ३५.९७ रुपयांवर होता, तो आज १२ फेब्रुवारी २०२५ रोजी १२४८.८० रुपयांवर पोहोचला आहे. गेल्या दोन वर्षांत एक्सप्रो इंडियाच्या शेअरमध्ये १२० टक्क्यांहून अधिक वाढ झाली आहे.

(डिस्क्लेमर: हे वृत्त केवळ माहितीपर आहे. तज्ज्ञांची मतं, सूचना व शिफारशी त्यांच्या वैयक्तिक आहेत. हिंदुस्तान टाइम्स मराठी कोणत्याही प्रकारच्या गुंतवणुकीचा सल्ला देत नाही. त्यामुळं गुंतवणूक करण्याआधी आर्थिक सल्लागाराशी चर्चा करा.)