Union Budget 2025: वाचा, केंद्रीय अर्थसंकल्पातून महाराष्ट्राला काय मिळाले?

देशाला विकसित राष्ट्र बनण्याच्या वाटेवर नेणारा अर्थसंकल्प- अर्थमंत्री अजित पवार

अर्थसंकल्पावर प्रतिक्रिया देतांना राज्याचे उपमुख्यमंत्री तथा अर्थमंत्री अजित पवार म्हणाले, 'देशातील शेतकरी, कष्टकरी, व्यापारी, उद्योजक, महिला, युवक, विद्यार्थी, सर्वसामान्य माणूस केंद्रबिंदू मानून सादर केलेल्या अर्थसंकल्पातून देशातल्या प्रत्येक व्यक्तीला विकासाची संधी, प्रत्येक समाजघटकाला बळ मिळणार आहे. देशाला आर्थिक महासत्ता आणि विकसित राष्ट्र बनण्याच्या वाटेवर नेणारा हा अर्थसंकल्प आहे. यातून महाराष्ट्राच्या पायाभूत विकासाला बळ मिळणार आहे. अर्थसंकल्पात विविध वस्तू-सेवांवरील सात प्रकारचे शुल्क हटवण्याचा निर्णय घेण्यात आला आहे. त्यामुळे त्या वस्तू-सेवा स्वस्त होतील. देशात तयार होणारे कपडे, चामड्याच्या वस्तू, मत्स्योत्पदनांवरील शुल्क कमी झाल्याने महाराष्ट्राला त्याचा फायदा होईल, असा विश्वास अजित पवार यानी व्यक्त केला.

हे वाचाः १२ लाखापर्यंत इन्कम टॅक्स नाही- निर्मला सीतारामन यांच्या घोषणेनंतर आनंदी आनंद

अर्थसंकल्पात शेती, आरोग्य, रोजगार, लघू आणि मध्यम उद्योग, निर्यात, गुंतवणूक, ऊर्जा, नागरिकरण, खाणकाम, अर्थ, कर आदी क्षेत्रांना प्राधान्य देण्यात आले असल्याचे अजित पवार म्हणाले. शेतकरी, महिला, युवक, गरीब वर्गासाठी विविध योजनांची घोषणा केली आहे. महिलांच्या कौशल्याविकास प्राथम्याचा विषय आहे. केंद्रीय अर्थमंत्र्यांनी जाहीर केलेल्या ‘पंतप्रधान धनधान्य योजनें’तर्गत शेती उत्पादकता वाढ, शेतमाल साठवणूक सुविधा, सिंचन आणि क्रेडीट सुविधांवर भर देण्यात येणार असून शंभर जिल्ह्यांवर लक्ष केंद्रीत करण्यात येणार आहे. त्याचा मोठा फायदा महाराष्ट्राला होईल. कापूस आणि डाळींचे उत्पादनवाढीसंदर्भात घेतलेले निर्णयही महाराष्ट्राच्या फायद्याचे आहे. किसान क्रेडीट कार्डची मर्यादा ५ लाख करण्याचा निर्णय स्वागतार्ह आहे. देशाला जगाचे फूड बास्केट बनविण्यात महाराष्ट्राची भूमिका प्रमुख असेल, असेही उपमुख्यमंत्री अजित पवार म्हणाले.

हे वाचाः १२ लाखापर्यंत टॅक्स सूट तर मग ८-१२ लाखापर्यंत १० टक्के टॅक्स कसाः विरोधकांचा सवाल