वारी एनर्जीजचा आयपीओ मार्केटमध्ये दिवाळी धमाका करणार, पहिल्याच दिवशी पैसे थेट दुप्पट होणार?

येत्या सोमवारी, २८ ऑक्टोबर रोजी कंपनीचे शेअर बीएसई आणि एनएसईवर सूचीबद्ध होणार आहेत. वारी एनर्जीजच्या शेअरची आयपीओ प्राइस १५०३ रुपये आहे. तर, ग्रे मार्केटमध्ये कंपनीचे शेअर्स १५०० रुपयांच्या प्रीमियमवर आहेत. ग्रे मार्केटमधील ही आकडेवारी लक्षात घेता वारी एनर्जीजचे शेअर्स ३००३ रुपयांच्या जवळपास लिस्ट होऊ शकतात. म्हणजेच ज्या गुंतवणूकदारांना आयपीओमध्ये कंपनीचे शेअर्स लागले आहेत, त्यांना लिस्टिंगच्या दिवशी जवळपास १०० टक्के नफा होऊ शकतो. 

हेही वाचा: तिमाही नफा घटल्यामुळं तब्बल १८ टक्क्यांनी कोसळला ‘या’ बँकेचा शेअर, आता काय करायचं?

वारी एनर्जीजचा एकूण पब्लिक इश्यू आकार ४३२१.४४ कोटी रुपये होता. आयपीओच्या आधी कंपनीतील प्रवर्तकांचा हिस्सा ७१.८० टक्के होता, तो आता ६४.३० टक्के होणार आहे.

आयपीओ ७९ पट सब्सक्राइब

वारी एनर्जीजचा आयपीओ एकूण ७९.४४ पट सब्सक्राइब झाला. आयपीओमध्ये किरकोळ गुंतवणूकदारांचा कोटा ११.२७ पट सब्सक्राइब झाला होता. तर बिगर संस्थात्मक गुंतवणूकदार (NII) श्रेणीत आयपीओ ६५.२५ पट सबस्क्राइब झाला. कंपनीचा आयपीओ क्वालिफाइड इन्स्टिट्यूशनल बायर्स (QIB) कोट्यात २१५.०३ पट सब्सक्राइब झाला आहे. वारी एनर्जीजच्या आयपीओमध्ये कर्मचाऱ्यांचा कोटा ५.४५ पट सब्सक्राइब करण्यात आला होता. कंपनीच्या आयपीओमध्ये किरकोळ गुंतवणूकदार कमीत कमी एका तर, जास्तीत जास्त १४ लॉटसाठी सट्टा लावू शकत होते. आयपीओच्या एका लॉटमध्ये ९ शेअर्स आहेत. रिटेल गुंतवणूकदारांना कंपनीच्या आयपीओमध्ये किमान १३,५२७ रुपयांची गुंतवणूक करावी लागली.

हेही वाचा: इन्फिनिक्सचा सर्वात स्वस्त फ्लिप फोन विक्रीसाठी उपलब्ध; फ्लिपकार्टवर मिळतेय मोठी सवलत

काय करते ही कंपनी?

१९९० मध्ये स्थापन झालेली ही देशातील सर्वात मोठी सोलर पॅनेल निर्मिती कंपनी आहे. कंपनीची ऊर्जा निर्मिती क्षमता १२ गिगावॅट आहे. ३० जून २०२३ पर्यंतच्या आकडेवारीनुसार, कंपनी चार ऊर्जा निर्मिती केंद्रे चालवते.

(डिस्क्लेमर: हे वृत्त केवळ माहितीपर आहे. हा कोणत्याही प्रकारच्या गुंतवणुकीचा सल्ला नाही. शेअर बाजारातील गुंतवणुकीत जोखीम असते. त्यामुळं गुंतवणूक करण्याआधी आर्थिक सल्लागाराशी चर्चा करा.)