Vi Share Price : कंपनीनं ११,६५० कोटींचं कर्ज फेडताच शेअर उसळला! अजूनही १० रुपयांपेक्षा कमी भाव

आठवड्याच्या पहिल्याच दिवशी, आज सकाळी व्होडाफोन आयडियाच्या शेअर्समध्ये वाढ झाली आहे. कंपनीचे शेअर्स आज आठ रुपयांच्या पातळीवर उघडले. व्होडाफोन आयडियाच्या शेअर्समध्ये वाढ होण्यामागं दोन मोठ्या बातम्या कारणीभूत मानल्या जात आहेत.

रिफॉर्म पॅकेजच्या आधी आयोजित केलेल्या स्पेक्ट्रम लिलावासाठी बँक गॅरंटी सादर करण्याची अट दूरसंचार विभागानं काढून टाकली आहे. दूरसंचार विभागाच्या या निर्णयाचं व्होडाफोन-आयडियानं स्वागत केलं आहे. २७ डिसेंबर रोजी दूरसंचार विभागात हा आदेश जारी करण्यात आला आहे. यामुळं भारतात ४जी आणि ५जी मधील गुंतवणुकीला चालना मिळेल असं कंपनीचं म्हणणं आहे. तसंच, शेअर्सच्या बदल्यात उभारलेल्या १०.९ कोटी पौंडांची म्हणजेच सुमारे ११,६५० कोटी रुपयांची थकबाकी कंपनीनं परत केली आहे.

हेही वाचा: शेअर बाजारात प्रचलित असलेल्या अप्पर सर्किट आणि लोअर सर्किट या संकल्पनांचा अर्थ काय?

कंपनीनं काय म्हटलं आहे?

व्होडाफोन समूहानं कर्ज उभारण्यासाठी VIL मधील आपला संपूर्ण हिस्सा गहाण ठेवला होता. मॉरिशस आणि भारत स्थित व्होडाफोन समूहातील संस्थांनी कर्ज उभारण्यासाठी HSBC कॉर्पोरेट ट्रस्टी कंपनी (UK) च्या नावे समभाग तारण ठेवले होते. 

कंपनीनं स्टॉक एक्स्चेंजला दिलेल्या माहितीनुसार, 'व्होडाफोनच्या प्रवर्तकांचं कर्ज फेडल्यानंतर कर्जदारांसाठी सुरक्षा विश्वस्त म्हणून काम करणाऱ्या एचएसबीसी कॉर्पोरेट ट्रस्टी कंपनी (UK) लिमिटेडनं तारण म्हणून ठेवलेले शेअर्स २७ डिसेंबर रोजी जारी केले आहेत. व्होडाफोन इंडिया लिमिटेडमध्ये व्होडाफोन ग्रुपचा हिस्सा २२.५६ टक्के आहे, तर आदित्य बिर्ला ग्रुपचा हिस्सा १४.७६ टक्के आणि सरकारचा २३.१५ टक्के आहे.

हेही वाचा: पाच वर्षांत १८,००० टक्के नफा मिळवून देणारी कंपनी आता देणार मोफत शेअर्स, तुम्हालाही मिळू शकतो लाभ

शेअरचा सध्या भाव काय?

गेल्या वर्षभरात व्होडाफोन आयडियाच्या शेअरनं गुंतवणूकदारांना मोठा धक्का दिला आहे. या कालावधीत कंपनीच्या शेअरमध्ये ५४ टक्क्यांहून अधिक घट झाली आहे. तर, सहा महिन्यात कंपनीचा शेअर ५६ टक्क्यांनी घसरला आहे. आज ७ टक्क्यांनी उसळलेला शेअर सध्या (दुपारी १.३० वाजता) ३.७५ टक्क्यांनी वधारून ७.७५ रुपयांवर ट्रेड करत आहे.

(डिस्क्लेमर: हे वृत्त केवळ माहितीपर आहे. हिंदुस्तान टाइम्स मराठी कोणत्याही प्रकारच्या गुंतवणुकीचा सल्ला देत नाही. त्यामुळं गुंतवणूक करण्याआधी आर्थिक सल्लागाराशी चर्चा करा.)