Dividend Stock : मोठी बातमी! वेदांतानं केली वर्षातील चौथ्या डिविडंडची घोषणा, एका शेअरवर किती रुपये मिळणार? वाचा!

वेदांता लिमिटेडच्या संचालक मंडळाची बैठक आज म्हणजेच सोमवार,  १६ डिसेंबर २०२४ रोजी झाली. या बैठकीत २०२४-२५ या आर्थिक वर्षासाठी १ रुपये फेस व्हॅल्यू असलेल्या प्रत्येक शेअरवर ८.५ रुपये लाभांश देण्यास मान्यता देण्यात आली. त्यासाठी पुढील आठवड्यातील २४ डिसेंबर ही रेकॉर्ड डेट निश्चित करण्यात आली आहे. अंतरिम लाभांश कायद्यानुसार विहित मुदतीत देण्यात येईल, असं कंपनीनं आज दाखल केलेल्या निवेदनात म्हटलं आहे.

या वर्षात आतापर्यंत किती डिविडंड?

वेदांता कंपनीची ओळख 'डिविडंड किंग' अशी आहे. कंपनी सातत्यानं आपल्या शेअरहोल्डर्सना डिविडंड देत असते. डिविडंडची रक्कमही चांगली असते. गेल्या १२ महिन्यांत वेदांतानं प्रति शेअर ४६ रुपये लाभांश जाहीर केला आहे. तर, चालू आर्थिक वर्षात कंपनीने मे महिन्यात ११ रुपये, ऑगस्टमध्ये ४ रुपये आणि सप्टेंबरमध्ये २० रुपये अंतरिम लाभांश जाहीर केला आहे. त्यात आता ८.५ रुपयांची भर पडली आहे. जुलै २००१ पासून कंपनीनं ४६ वेळा डिविडंड जाहीर केला आहे.

हेही वाचा: पेटीएमच्या शेअरचा बाजारात धुमाकूळ; दहा महिन्यांत दिला २१० टक्के नफा, आजचा भाव किती?

वेदांताच्या शेअरची वाटचाल

अनिल अग्रवाल यांच्या नेतृत्वाखालील कंपनीनं अलीकडच्या काळात गुंतवणूकदारांना चांगला परतावा दिला आहे. वर्षभरात हा शेअर ९७ टक्क्यांनी वधारला आहे, तर गेल्या सहा महिन्यांत तो १५ टक्क्यांनी वधारला आहे. तीन महिन्यांपेक्षा कमी कालावधीत त्यात १३ टक्के वाढ झाली आहे, तर गेल्या महिनाभरात त्यात सुमारे १९ टक्क्यांची भर पडली आहे. लाभांश जाहीर होण्याआधी आज बीएसईवर वेदांताच्या शेअरचा भाव १.२१ टक्क्यांनी घसरून ५१३.४० रुपयांवर बंद झाला.

रेटिंग अ‍ॅक्शन 

लाभांशाच्या घोषणेव्यतिरिक्त कंपनीनं इंडिया रेटिंग्स अँड रिसर्चकडून रेटिंग अपग्रेडचीही माहिती दिली. फिच समूहाचा भाग असलेल्या पतमानांकन एजन्सीनं वेदांताच्या नॉन-कन्व्हर्टिबल डिबेंचर्स (एनसीडी) आयएनडी एए-वरील रेटिंग मध्ये सुधारणा केली आहे.

हेही वाचा: मोबिक्विक आयपीओचं वाटप झालं! तुम्हाला शेअर मिळाले की नाही? असं तपासा!

(डिस्क्लेमर: हे वृत्त केवळ माहितीपर आहे. हिंदुस्तान टाइम्स मराठी कोणत्याही प्रकारच्या गुंतवणुकीचा सल्ला देत नाही. त्यामुळं गुंतवणूक करण्याआधी आर्थिक सल्लागाराशी चर्चा करा.)