हे ६ शेअर्स वर्षभरात करू शकतात तुम्हाला मालामाल, एक्सपर्ट्सनी सांगितली नावं
Stocks to Buy : किरकोळ गुंतवणूकदारांच्या वाढत्या सहभागामुळं येत्या काळात बाजार स्थिर राहील असा तज्ज्ञांना विश्वास असून पुढील वर्षभरात नफा मिळवून देऊ शकणारे काही शेअर्स ब्रोकरेजनी सुचवले आहेत.
Stocks to Buy : भारतीय शेअर बाजाराचे पहिल्या तिमाहीचे निकाल आतापर्यंत संमिश्र राहिले आहेत. त्यामुळं आधीच तेजीत असलेल्या भारतीय शेअर बाजारावर त्याचा फारसा परिणाम झालेला दिसत नाही. निफ्टीनं २० जुलैला पहिल्यांदाच २५ हजारांचा टप्पा पार केला खरा, पण ती पातळी टिकवता आली नाही. आज पुन्हा निफ्टी आणि सेन्सेक्स वरच्या दिशेनं झेपावत आहे.
बाजाराचं मूल्यांकन हा सध्या चिंतेचा विषय असला तरी किरकोळ गुंतवणूकदारांच्या उत्साही सहभागामुळं शेअर बाजार स्थिर राहील, असं तज्ज्ञांचं मत आहे. संस्थात्मक गुंतवणूकदार उच्च-गुणवत्तेच्या शेअर्सवर लक्ष केंद्रित करताना दिसत आहे. हे बाजारासाठी चांगलं लक्षण आहे, असं जिओजित फायनान्शियल सर्व्हिसेसचे चीफ इन्व्हेस्टमेंट स्ट्रॅटेजिस्ट व्ही. के. विजयकुमार यांनी सांगितलं.
अनेक ब्रोकरेज कंपन्यांच्या शिफारशींच्या आधारे येत्या वर्षभरात १२ ते १७ टक्क्यांनी वाढू शकणाऱ्या सहा समभागांची यादी इथं देत आहोत.
मोतीलाल ओसवाल फायनान्शियल सर्व्हिसेसची शिफारस
भारत इलेक्ट्रॉनिक्स
बीईएलचे आर्थिक वर्ष २०२५ च्या पहिल्या तिमाहीचे निकाल अपेक्षेपेक्षा चांगले आहेत. त्यामुळं हा शेअर पुढंही मजबूत वाटचाल करेल, असा विश्वास मोतीलाल ओसवाल फायनान्शियल सर्व्हिसेसला आहे. हा शेअर सध्या ३१९.८५ रुपयांवर ट्रेड करत आहे. त्यात १२ टक्के वाढीची अपेक्षा असून तो ३६० पर्यंत जाऊ शकतो.
झेन टेक्नॉलॉजीज
झेन टेक्नॉलजीजचा शेअर सध्या १६७५ रुपयांवर ट्रेड करत आहे. हा शेअर १८२० रुपयांवर जाऊ शकतो असा अंदाज आहे. या शेअरवर मोतीलालनं आधी १७७५ हे टार्गेट ठेवलं होतं, ते आता वाढवलं आहे.
जेएम फायनान्शियलची शिफारस
एनटीपीसी
आर्थिक वर्ष २०२५ च्या पहिल्या तिमाहीत एनटीपीसीचे उत्पन्न ४८,५०० कोटी रुपये होते. वार्षिक आधारावर हे उत्पन्न १३ टक्क्यांनी आणि तिमाही दर तिमाही आधारावर २ टक्क्यांनी वाढलं आहे. जेएम फायनान्शिअल्सच्या अंदाजापेक्षा हे उत्पन्न अधिक आहे. या पार्श्वभूमीवर ब्रोकरेजला या शेअरच्या बाबतीत आशा आहे. सध्या एनटीपीसीचा शेअर ४०४.८० रुपये आहे. तो ४५१ पर्यंत वाढू शकतो, असा ब्रोकरेजचा अंदाज आहे.
चोलामंडलम इन्व्हेस्टमेंट अँड फायनान्स
जेएम फायनान्शिअलच्या म्हणण्यानुसार, चोलामंडलमच्या व्यवस्थापनानं नवीन व्यवसायांमध्ये ऑपरेशनल खर्च कमी होण्यासाठी प्रयत्न केले आहेत. त्याचबरोबर चांगल्या मान्सूनमुळं चांगल्या वसुलीमुळं दुसऱ्या सहामाहीत पतपुरवठा सुरळीत होण्याची शक्यता आहे. त्यामुळं व्यवसाय विस्तारास गती मिळेल. या सगळ्या पार्श्वभूमीवर चोलामंडलमच्या शेअर वाढण्याची शक्यता आहे. हा शेअर सध्या १४२३ च्या आसपास आहे. तो १,६५० रुपयांवर जाईल असा अंदाज आहे.
नुवामा वेल्थ मॅनेजमेंटची शिफारस
अरविंद लिमिटेड
अरविंद लिमिटेडचा शेअर सध्या ३७७ च्या आसपास आहे. या शेअरमध्ये १५ टक्क्यांची वाढ अपेक्षित असून तो ४३१ वर जाईल, असा अंदाज नुवामा वेल्थ मॅनेजमेंटनं व्यक्त केला आहे.
कोलगेट पामोलिव्ह (इंडिया)
कोलगेट पामोलिव्ह इंडियाचा आर्थिक वर्ष २०२५ च्या पहिल्या तिमाहीतील महसूल, एबिटडा आणि करोत्तर नफा (PAT) अनुक्रमे १३ टक्के, २२ टक्के आणि २४ टक्क्यांनी वाढला आहे. येत्या काळातही कंपनीची कामगिरी उत्तम राहील अशी अपेक्षा आहे. हा शेअर सध्या ३३९०.७५ रुपयांवर ट्रेड करत आहे तो ३७४५ वर जाईल, असा नुवामाचा अंदाज आहे.
(डिस्क्लेमर: वरील मतं आणि शिफारशी विश्लेषकांच्या वैयक्तिक आहेत. हिंदुस्तान टाइम्स मराठी त्याच्याशी सहमत असेलच असं नाही. हा कोणत्याही प्रकारचा गुंतवणुकीचा सल्ला नाही. शेअर बाजारातील गुंतवणुकीत जोखीम असते. त्यामुळं गुंतवणुकीचा कोणताही निर्णय घेण्याआधी आपल्या आर्थिक सल्लागाराशी चर्चा करावी.)
संबंधित बातम्या