Stock Market : स्विगीचे शेअर्स विकून पळू लागले गुंतवणूकदार; आयपीओ किमतीच्याही खाली गेला भाव

शेअर बाजार उघडताच स्विगीचा शेअर ७ टक्क्यांहून अधिक घसरला आणि इंट्राडे नीचांकी स्तर ३८७ रुपयांवर घसरला. ही त्याची ५२ आठवड्यांची नीचांकी किंमत आहे. चालू आर्थिक वर्षाच्या डिसेंबर तिमाहीत कंपनीचा तोटा सुमारे ८०० कोटी रुपयांवर गेला आहे.

ऑनलाइन ऑर्डरवर अन्न आणि किराणा मालाचा पुरवठा करणाऱ्या स्विगीचा निव्वळ तोटा ३१ डिसेंबर २०१९ रोजी संपलेल्या तिसऱ्या तिमाहीत वाढून ७९९.०८ कोटी रुपयांवर पोहोचला आहे. गेल्या वर्षी याच तिमाहीत कंपनीला ५७४.३८ कोटी रुपयांचा निव्वळ तोटा झाला होता. कंपनीच्या तोट्यात वार्षिक आधारावर ३९ टक्क्यांनी वाढ झाली आहे.

हेही वाचा: आरबीआयचं पतधोरण उद्या जाहीर होणार; कोणते स्टॉक्स ठरू शकतात फायदेशीर?

स्विगीनं शेअर बाजाराला दिलेल्या माहितीनुसार, आर्थिक वर्ष २०२३-२४ च्या ऑक्टोबर-डिसेंबर तिमाहीत ३,७०० कोटी रुपयांवरून कंपनीचा एकूण खर्च ४८९८.२७ कोटी रुपयांवर पोहोचला आहे. कंपनीचं ऑपरेटिंग उत्पन्नही या तिमाहीत ३,०४८.६९ कोटी रुपयांवरून ३,९९३.०६ कोटी रुपयांवर पोहोचलं आहे.

काय म्हणाली कंपनी?

स्विगीचे व्यवस्थापकीय संचालक आणि समूहाचे मुख्य कार्यकारी अधिकारी (सीईओ) श्रीहर्ष माजेटी यांनी तिमाही निकालांवर भाष्य केलं आहे. 'सणासुदीच्या काळात ग्राहकांना विशेष ऑफर देण्यावर आमचा भर आहे, ज्यामुळे ग्राहक अधिकाधिक सेवा घेतील, असा विश्वास त्यांनी व्यक्त केला आहे.

हेही वाचा : आज खरेदी करा 'हे' ५ स्वस्त शेअर; मोठ्या नफ्याची तज्ञांना आशा

किती होती आयपीओ प्राइस?

मागील वर्षी आलेला स्विगीचा आयपीओ आला होता. हा शेअर १३ नोव्हेंबर २०२४ रोजी शेअर बाजारात लिस्ट झाला होता. स्विगीचे शेअर्स आयपीओच्या किमतीच्या ८ टक्के प्रीमियमवर सूचीबद्ध झाले होते. कंपनीच्या शेअरची आयपीओ किंमत ३९० रुपये होती. आजच्या व्यवहारात हा शेअर ३९० च्याही खाली गेला.

(डिस्क्लेमर: हे वृत्त केवळ माहितीपर आहे. तज्ज्ञांची मतं, सूचना व शिफारशी त्यांच्या वैयक्तिक आहेत. हिंदुस्तान टाइम्स मराठी कोणत्याही प्रकारच्या गुंतवणुकीचा सल्ला देत नाही. त्यामुळं गुंतवणूक करण्याआधी आर्थिक सल्लागाराशी चर्चा करा.)