Swiggy news : अबब… स्विगी डिलिव्हरी बॉय महिन्याला कमावतो ५०,००० रुपये…

लवीना कामत सांगते, ‘भारतात आयटी इंजिनिअरचा महिन्याचा पगार सरासरी २०,००० रुपये असतो. मात्र बेंगळुरुत मी ज्या दोन फूड डिलिव्हरी एजंटशी बोलले त्यांना यापेक्षा दुप्पट पगार मिळतो.’

स्विगीमध्ये डिलिव्हरी ड्रायव्हर म्हणून काम करणारा २२ वर्षीय शिवा हा तरुण गेल्या तीन वर्षांपासून डिलिव्हरी एजंट म्हणून काम करत आहे. शिवाची दर महिन्याला तब्बल ४० ते ५० हजार रुपये कमाई होते. शिवाला स्विगीच्या प्रत्येक डिलिव्हरीवर २० रुपये कमिशन मिळते. मात्र टिप्समधून शिवाला दर महिन्याला सुमारे ५ हजार रुपये मिळत असल्याचं त्याने सांगितलं. 

शिवाला गावात उघडायचय ‘डी-मार्ट’

स्विगी डिलिवरी बॉय शिवा आर्थिक बचतीवर भर असते. गेल्या सहा महिन्यांत शिवाने दोन लाख रुपयांची बचत केली आहे. गावात जाऊन डी-मार्ट उघडून स्वतःचा व्यवसाय सुरू करण्यासाठी तो बचतीचे पैसे वापरणार आहे. डी-मार्टमुळे गावातील तरुणांना रोजगार मिळेल असं शिवाचं म्हणण आहे.

दरम्यान, तायप्पा हा तरुण गेल्या तीन वर्षांपासून बेंगळुरुमध्ये झोमॅटो कंपनीसाठी डिलिव्हरी एजंट म्हणून काम करतोय. युट्यूबर लवीना कामत हिने तायप्पाशी संवाद साधून त्याच्या महिन्याच्या कमाईबाबत विचारले. तायप्पा महिन्याला ४० हजार रुपयांपर्यंत कमाई करतो, असं त्यानं स्पष्ट केलं.

हे वाचाः स्विगीची नवी योजना; प्रत्येक ऑर्डरवर मिळणार फ्री डिलिव्हरी आणि ६० टक्के सूट

लवीना कामत यांनी इन्स्टाग्रामवर हा व्हिडिओ शेअर केला आहे. फूड डिलिव्हरी एजंट अगदी सॉफ्टवेअर इंजिनीअर्सपेक्षा जास्त कमाई करत असल्याचं कामत यांनी लिहिलं आहे. मात्र, बहुतांश डिलिव्हरी बॉय हे या कामाकडे करिअर म्हणून पाहत नाहीत. तर भविष्यातील चांगल्या संधीसाठी ते याकडे पैसे कमविण्याचे साधन म्हणून पाहतात. डिलिव्हरी बॉय हे दिवसाला १२ ते १३ तास काम करून एवढी कमाई करतात, याकडेही लवीन कामत यांनी लक्ष वेधले आहे.

हे वाचाः शाकाहारी ग्राहकांसाठी झोमॅटोचा प्युअर व्हेज मोड; डिलिव्हरी बॉयचा पेहरावही बदलणार

सोशल मीडियावर प्रतिक्रिया

दरम्यान, या फूड डिलिव्हरी बॉयच्या कमाईमुळे अनेक लोक चांगलेच प्रभावित झाले असल्याचं व्हिडिओच्या खाली आलेल्या कमेंटमधून दिसून येत. सॉफ्टवेअर इंजिनीअर्सच्या तुलनेत डिलिव्हरी एजंट किती मेहनत घेतात याकडे काहींनी लक्ष वेधलं आहे. डिलिवरी बॉय म्हणून काम करण्याचा त्रास अभियंत्यांपेक्षा पूर्णपणे वेगळा असतो, असे एका इन्स्टाग्राम युजरने लिहिलं आहे. 'लोकांना हे कळत नाही की इंजिनीअर २५-३० हजारांपासून सुरूवात करतो. परंतु शेवटी त्याच्या एकूण पॅकेजमध्ये मोठी वाढ होत असते. परंतु डिलिव्हरी बॉयच्या बाबत हे होत नाही. त्यामुळे ही तुलना होऊ शकत नाही' अशी प्रतिक्रिया एका यूजरने लिहिली आहे.

एक युजर लिहितो,'महिन्याला ७० हजार रुपये कमावणाऱ्या एका झोमॅटो रायडरला मी ओळखतो. मात्र तो न थांबता, दिवसरात्र काम करायचा. त्याने एवढ्या डिलिव्हरी करून इतके पैसे कमावल्याबद्दल झोमॅटोने त्या डिलिवरी बॉयला लॅपटॉप आणि इलेक्ट्रिक स्कूटर भेट म्हणून दिले होते.'

हे वाचाः तुमच्या घरातील प्राळीव प्राणी हरवलंय? काळजी नको, आता स्विगी शोधून आणणार!