सुझलॉन एनर्जीचा शेअर तुमच्याकडं असेल तर तुमच्यासाठी चांगली बातमी आहे! कंपनीला मिळालाय मोठा दिलासा

सुझलॉननं स्टॉक एक्स्चेंजला या संदर्भात माहिती दिली आहे.  त्यानुसार इन्कम टॅक्सच्या नॅशनल फेसलेस पेनल्टी सेंटरनं २०१७ या आर्थिक वर्षासाठी कंपनीला १७२.७६ कोटी रुपयांचा दंड ठोठावला होता. मार्च २०२४ मध्ये सुझलॉननं एक्सचेंजला याची माहिती दिली. त्याचवेळी, या आदेशाविरोधात कंपनीनं प्राप्तिकर अपिलीय न्यायाधिकरणाकडं अर्ज दाखल केला होता आणि आता लवादानं कंपनीच्या बाजूनं निकाल दिला आहे. त्यानुसार, कंपनीला तब्बल १७३ कोटींचा परतावा मिळणार आहे.

हेही वाचा: कंपनीनं ११,६५० कोटींचं कर्ज फेडताच शेअर उसळला! भाव अजूनही १० रुपयांपेक्षा कमी

पाच वर्षांत २ रुपयांवरून ६३ रुपयांवर

सुझलॉन एनर्जीच्या शेअरमध्ये सातत्यानं चढ-उतार होत आहेत. कंपनीचे शेअर्स एका महिन्यात ६ टक्क्यांनी घसरले असून सहा महिन्यांत १७ टक्क्यांनी वाढले आहेत. २०२४ मध्ये हा शेअर आतापर्यंत ६३ टक्क्यांनी वधारला आहे. पाच वर्षांत कंपनीच्या शेअर्समध्ये २४०० टक्क्यांहून अधिक वाढ झाली आहे. या दरम्यान त्याची किंमत २ रुपयांवरून सध्याच्या किंमतीपर्यंत वाढली आहे. 

विदेशी गुंतवणूकदारांचा विश्वास वाढला!

सुझलॉन एनर्जीच्या शेअर्सची ५२ आठवड्यांतील उच्चांकी किंमत ८६.०४ रुपये आणि ५२ आठवड्यांची नीचांकी किंमत ३५.४९ रुपये आहे. कंपनीचं मार्केट कॅप ८४,९१३.६८ कोटी रुपये आहे. सुझलॉन एनर्जीमध्ये परदेशी गुंतवणूकदारांचा मोठा वाटा आहे. सप्टेंबर २०२३ मध्ये एफआयआयकडे १०.८८ टक्के हिस्सा होता. सप्टेंबर २०२४ मध्ये तो वाढून २३.७२ टक्के झाला आहे.

हेही वाचा: शेअर बाजारात प्रचलित असलेल्या अप्पर सर्किट आणि लोअर सर्किट या संकल्पनांचा अर्थ काय?

(डिस्क्लेमर: हे वृत्त केवळ माहितीपर आहे. हिंदुस्तान टाइम्स मराठी कोणत्याही प्रकारच्या गुंतवणुकीचा सल्ला देत नाही. त्यामुळं गुंतवणूक करण्याआधी आर्थिक सल्लागाराशी चर्चा करा.)