अशी गुंतवणूक कोणाला आवडणार नाही? अवघ्या ४ वर्षांत 'या' शेअरमध्ये ७,००० टक्क्यांची वाढ

सर्वोटेक पॉवर सिस्टीम्सला केरळ सरकारकडून १२ इलेक्ट्रिक व्हेइकल (EV) चार्जिंग स्टेशन बसवण्याची मोठी ऑर्डर मिळाली आहे. त्याचा सकारात्मक परिणाम शेअरवर दिसत आहे. आज हा शेअर ४ टक्क्यांनी वधारून १३७.४० रुपयांवर पोहोचला.

सर्वोटेक पॉवर सिस्टीम्स लिमिटेडला केरळ सरकारच्या ऊर्जा विभागाच्या एजन्सी फॉर न्यू अँड रिन्यूएबल एनर्जी रिसर्च अँड टेक्नॉलॉजी (ANERT) कडून १२ ईव्ही चार्जिंग स्टेशन बसविण्याचं कंत्राट मिळालं आहे. या करारानुसार सर्वोटेक पॉवर सिस्टीम केरळ मोटार वाहन विभागाच्या विविध ठिकाणी ३० किलोवॅट फास्ट डीसी ईव्ही चार्जरसह १२ इलेक्ट्रिक वाहन चार्जिंग स्टेशन उभारणार आहे. या करारामध्ये ईव्ही चार्जिंग स्टेशनचा पुरवठा, कमिशनिंग आणि बांधकाम यांचा समावेश आहे.

शेअरमध्ये अशी झाली वाढ

सर्वोटेक पॉवर सिस्टीम्स लिमिटेडच्या शेअरमध्ये चार वर्षांत ७०३५ टक्क्यांहून अधिक वाढ झाली आहे. सर्वोटेक पॉवर सिस्टीम्सचा शेअर २९ ऑक्टोबर २०२१ रोजी १.९१ रुपयांवर होता. आज, २१ ऑगस्ट २०२४ रोजी हाच शेअर १३७.४० रुपयांवर पोहोचला आहे.

हेही वाचा: एवढ्या कमी वेळात इतके रिटर्न्स कुठं मिळतात? या शेअरनं किती नफा मिळवून दिला बघाच!

१ लाखाचे झाले ७२ लाख

एखाद्या व्यक्तीनं २९ ऑक्टोबर २०२१ रोजी सर्वोटेक पॉवर सिस्टम्सच्या शेअर्समध्ये १ लाख रुपयांची गुंतवणूक केली असती आणि ही गुंतवणूक कायम ठेवली असती तर त्या शेअर्सची किंमत आज ७१.९३ लाख रुपये झाली असती. 

गेल्या वर्षभरात सर्वोटेक पॉवर सिस्टीम्सच्या शेअरमध्ये ५५ टक्क्यांहून अधिक वाढ झाली आहे. गेल्या दोन वर्षांत सर्वोटेक पॉवर सिस्टीम्स लिमिटेडचे शेअर्स २०५० टक्क्यांनी वधारले आहेत. १९ ऑगस्ट २०२२ रोजी सर्वोटेक पॉवरचा शेअर ६.३० रुपयांवर होता. २१ ऑगस्ट २०२४ रोजी कंपनीचा शेअर १३७.४० रुपयांवर पोहोचला आहे.

(डिस्क्लेमर : हे वृत्त केवळ माहितीपर आहे. हा कोणत्याही प्रकारचा गुंतवणुकीचा सल्ला नाही. शेअर बाजारातील गुंतवणुकीत जोखीम असते. गुंतवणूक करण्यापूर्वी आपल्या सल्लागाराचा सल्ला घ्या.)