रेडटेप कंपनीचा डबल धमाका! एका शेअरवर ३ शेअर मोफत देणार; प्रत्येक शेअरवर स्वतंत्र डिविडंडही मिळणार

रेडटेप कंपनीच्या संचालक मंडळानं आपल्या शेअरहोल्डर्सना ३:१ या प्रमाणात बोनस देण्याचा निर्णय घेतला आहे. याचा अर्थ गुंतवणूकदारांना त्यांच्या विद्यमान समभागांपैकी प्रत्येकासाठी तीन नवीन पूर्णपणे पेड अप इक्विटी शेअर्स मिळतील. एकूण ४१,४६,०५,७०० इक्विटी शेअर्स बोनस शेअर म्हणून देण्यात येणार असल्याची माहिती कंपनीनं शेअर बाजाराला दिली. या निर्णयाला सदस्यांची मंजुरी मिळणं अपेक्षित आहे. कंपनीनं बोनस शेअर इश्यूची रेकॉर्ड डेट अद्याप जाहीर केलेली नाही. बोनस शेअरबरोबरच रेडटेपनं आपल्या शेअरहोल्डर्सना प्रति शेअर २ रुपये अंतरिम लाभांश देखील जाहीर केला आहे.

हेही वाचा: युनिमेक एरोस्पोसच्या आयपीओचा ग्रे मार्केटमध्ये बोलबाला, पाहा जीएमपी व इतर माहिती

काय म्हणाली कंपनी?

कंपनीनं दिलेल्या माहितीनुसार, संचालक मंडळाच्या सदस्यानं २०२४-२५ या आर्थिक वर्षासाठी प्रति समभाग २ रुपये (१०० टक्के) अंतरिम लाभांश जाहीर केला आहे. तसंच, कंपनीनं अंतरिम लाभांश मिळण्यास पात्र भागधारकांची निवड करण्याच्या उद्देशाने ३ जानेवारी ही रेकॉर्ड डेट निश्चित केली आहे.

कशी राहिली आज शेअरची वाटचाल?

बोनस आणि डिविडंडच्या घोषणेनंतर रेडटेपच्या शेअरमध्ये तेजी दिसून आली. बीएसईवर रेडटेपच्या शेअरचा भाव ५.२५ टक्क्यांनी वधारून ९१५ रुपयांच्या दिवसाच्या उच्चांकी पातळीवर पोहोचला. हा शेअर ५२ आठवड्यांच्या उच्चांकी ९८१.८० पातळीपासून केवळ ७ टक्क्यांनी दूर आहे, तर ५२ आठवड्यांच्या नीचांकी ४५४.७५ रुपयांवरून दुपटीहून अधिक वाढला आहे. रेडटेप बीएसई स्मॉलकॅप इंडेक्सचा भाग आहे आणि या कंपनीचं मार्केट कॅप सुमारे १२,४०० कोटी रुपये आहे.

हेही वाचा: अवघ्या दीड महिन्यात ७० टक्क्यांनी वाढला शेअर, आज लागलं अप्पर सर्किट! तुमच्याकडं आहे का?

(डिस्क्लेमर: हे वृत्त केवळ माहितीपर आहे. हिंदुस्तान टाइम्स मराठी कोणत्याही प्रकारच्या गुंतवणुकीचा सल्ला देत नाही. त्यामुळं गुंतवणूक करण्याआधी आर्थिक सल्लागाराशी चर्चा करा.)