न्यू इंडिया को-ऑपरेटिव्ह बँकेवर आरबीआयचे निर्बंध, ठेवीदारांच्या पैशाचं काय होणार?

आरबीआयने काय कारवाई केली?

रिझर्व्ह बँकेने म्हटले आहे की, न्यू इंडिया को-ऑपरेटिव्ह बँकेची सध्याची तरलता स्थिती लक्षात घेता बचत बँक किंवा चालू खाते किंवा ठेवीदाराच्या इतर कोणत्याही खात्यातून कोणतीही रक्कम काढू देऊ नये, असे निर्देश देण्यात आले आहेत. मात्र, कर्मचाऱ्यांचे वेतन, भाडे आणि वीज बिल अशा काही जीवनावश्यक वस्तूंचा खर्च बँक उचलू शकते.

बँक बंद झाली का?

रिझर्व्ह बँकेने बँकेचा परवाना रद्द केलेला नाही, फक्त कडक निर्बंध लादले आहेत. त्यामुळे बँक बंद नसल्याचे स्पष्ट झाले आहे. रिझर्व्ह बँक वेळोवेळी आढावा घेऊन ही बंदी वाढवण्याबाबत किंवा हटवण्याबाबत निर्णय घेऊ शकते. परिस्थिती बिघडल्यास परवाना रद्द करण्याचा अधिकारही आरबीआयकडे आहे. आरबीआयने स्पष्ट केले आहे की, या सूचनांचा अर्थ बँकेचा बँकिंग परवाना रद्द करण्यात आला असा नाही. आरबीआय परिस्थितीवर लक्ष ठेवून राहील आणि आवश्यकतेनुसार आवश्यक कारवाई करेल.

ग्राहकांच्या ठेवींचे काय होणार?

न्यू इंडिया को-ऑपरेटिव्ह बँकेच्या ठेवीदारांना डिपॉझिट इन्शुरन्स अँड क्रेडिट गॅरंटी कॉर्पोरेशनच्या (डीआयसीजीसी) माध्यमातून पाच लाख रुपयांपर्यंतची वसुली करता येते. रिझर्व्ह बँकेने म्हटले आहे की, पात्र ठेवीदारांना डीआयसीजीसीकडून समान क्षमतेने आणि समान हक्काने पाच लाख रुपयांपर्यंतच्या ठेवींसाठी विमा दावा योग्य पडताळणीनंतर प्राप्त होईल.

न्यू इंडिया को-ऑपरेटिव्ह बँक गेल्या दोन आर्थिक वर्षांपासून तोट्यात आहे. वार्षिक अहवालानुसार मार्च २०२४ मध्ये संपलेल्या आर्थिक वर्षात बँकेला २३ कोटी रुपयांचा तोटा झाला आहे. यापूर्वी 2023 या आर्थिक वर्षात 31 कोटी रुपयांचा तोटा झाला होता. 31 मार्च 2024 पर्यंत बँकेचे कर्ज घटून 1,175 कोटी रुपयांवर आले आहे. वर्षभरापूर्वी हा आकडा १३३० कोटी रुपये होता. रॉयटर्सच्या रिपोर्टनुसार, बँकेच्या ठेवी 2406 कोटी रुपयांवरून 2436 कोटी रुपयांवर पोहोचल्या आहेत.

५७ वर्षांपूर्वी स्थापन झालेल्या न्यू इंडिया को-ऑपरेटिव्ह बँक लिमिटेडचे मुख्यालय मुंबईत आहे. या बँकेची स्थापना १९६८ मध्ये मुंबईत झाली आणि १९७७ मध्ये त्याचे नामकरण न्यू इंडिया को-ऑपरेटिव्ह बँक लिमिटेड असे करण्यात आले. तेव्हापासून ही बँक देशातील विविध राज्यांमध्ये शाखांचे जाळे असलेली एक मजबूत आणि अनुसूचित बहुराज्य बँक बनली आहे. गेल्या चार दशकांच्या कामकाजात बँकेने अनेक टप्पे गाठले आहेत. बँकेने मुंबई, ठाणे, सुरत आणि पुणे येथे ३० शाखा सुरू केल्या आहेत. १ नोव्हेंबर १९९० रोजी बँकेला 'शेड्युल्ड बँके'चा दर्जा मिळाला. २००४ मध्ये कोअर बँकिंग सोल्यूशन सर्व शाखांमध्ये लागू करण्यात आले. व्हिसा डेबिट कार्ड २००९ मध्ये लाँच करण्यात आले होते. ग्राहक सेवा युनिटची स्थापना २०१० मध्ये झाली. त्याचवेळी २०१० मध्ये इंटरनेट बँकिंग सुरू करण्यात आले.