रेमंडच्या 'या' शेअरची बाजारात धमाकेदार एन्ट्री! पहिल्याच दिवशी गुंतवणूकदारांचे पैसे दुप्पट

बीएसईवर रेमंड लाइफस्टाइल कंपनीच्या शेअरची मूळ किंमत १५०३.३ रुपये प्रति शेअर होती. तर, एनएसईवर कंपनीच्या शेअर्सची मूळ किंमत १५६२.६ रुपये होती. प्रत्यक्षात हा शेअर मूळ किंमतीपेक्षा खूपच वाढला आहे.

डीमर्जरनंतर झालीय लिस्टिंग

गौतम सिंघानिया यांच्या नेतृत्वाखालील रेमंड लिमिटेड या कंपनीनं आपला कन्झ्युमर लाइफस्टाइल व्यवसाय वेगळा केला होता. विभाजनानंतर रेमंड लाइफस्टाइलचे लग्न आणि पारंपरिक पोषाख, गारमेंट्स निर्यात, ब्रँडेड कपडे आणि वस्त्रोद्योग असे चार प्रमुख विभाग असतील. डीमर्जरनंतर रेमंड लाइफस्टाइलची मूळ कंपनी असलेल्या रेमंड लिमिटेडच्या शेअरहोल्डर्सना प्रत्येक ५ शेअरमागे ४ शेअर देण्यात आले. डीमर्जरनंतर रेमंड समूहातील रेमंड आणि रेमंड लाइफस्टाइल या दोन कंपन्या शेअर मार्केटमध्ये सूचीबद्ध करण्यात आल्या आहेत.

हेही वाचा: संयमाचं फळ किती गोड असू शकतं पाहा! ‘या’ शेअरनं १ लाखाचे बनवले ३३ लाख

लिस्टिंगनंतर शेअरमध्ये घसरण

रेमंड लाइफस्टाइलचा शेअर ९० टक्क्यांहून अधिक वाढीसह बीएसई आणि एनएसई दोन्ही एक्स्चेंजवर सूचीबद्ध झाला आहे. धडाकेबाज सुरुवातीनंतर कंपनीच्या शेअरमध्ये घसरण झाली आहे. बीएसईवर रेमंड लाइफस्टाइलचा शेअर ५ टक्क्यांनी घसरून २८५० रुपयांवर आला. तर, नॅशनल स्टॉक एक्स्चेंजमध्ये (NSE) रेमंड लाइफस्टाइलचा शेअर ५ टक्क्यांच्या लोअर सर्किटसह २८६९ रुपयांवर पोहोचला आहे. कंपनीचं मार्केट कॅप १७४७८.९९ कोटी रुपयांवर पोहोचलं आहे. 

मूळ कंपनीच्या शेअरमध्येही घसरण

मूळ कंपनी रेमंड लिमिटेडच्या शेअरमध्ये घसरण पाहायला मिळत आहे. रेमंड लिमिटेडचा शेअर गुरुवारी २ टक्क्यांहून अधिक घसरणीसह २०३०.४० रुपयांवर व्यवहार करत आहे. रेमंड लिमिटेडच्या शेअर्सचा ५२ आठवड्यांतील उच्चांकी स्तर ३४९३ रुपये आहे.

(डिस्क्लेमर : हे वृत्त केवळ माहितीपर आहे. हा कोणत्याही प्रकारचा गुंतवणुकीचा सल्ला नाही. शेअर बाजारातील गुंतवणुकीत जोखीम असते. गुंतवणूक करण्यापूर्वी आपल्या सल्लागाराचा सल्ला घ्या.)