Nykaa Share Price : नायका कंपनीचा शेअर खरेदी करावा की नाही? तिमाही निकालानंतर तज्ञांनी काय दिला सल्ला?

नायका ब्रँडची ऑपरेटर रिटेल कंपनी एफएसएन ई-कॉमर्स व्हेंचर्सनं सोमवारी, १० फेब्रुवारी रोजी बाजार बंद झाल्यानंतर डिसेंबर तिमाहीचे चांगले आकडे नोंदवले.

नायकाच्या शेअरचा भाव आज बीएसईवर १७१.८५ रुपयांवर खुला झाला. यापूर्वी तो १६९.६० रुपयांवर बंद झाला होता. त्यानंतर या शेअरनं गेल्या बंदच्या तुलनेत २.९४ टक्क्यांनी वधारून १७४.६० रुपयांच्या दिवसभरातील उच्चांकी पातळी गाठली. 

हेही वाचा : हिरव्या विजेवर महाराष्ट्र हिरवागार होणार; पुढील वर्षभरात संपूर्ण सिंचन हरित ऊर्जेवर करण्याचा महावितरणचा निर्धार

तिमाही निकालाचा तपशील

एफएसएन ई-कॉमर्स व्हेंचर्सचा एकत्रित निव्वळ नफा आर्थिक वर्ष २०२५ च्या तिसऱ्या तिमाहीत ६१.४३ टक्क्यांनी वाढून २६.१२ कोटी रुपयांवर पोहोचला आहे. आर्थिक वर्ष २०२५ च्या दुसऱ्या तिमाहीतील १०.०४ कोटी रुपयांच्या तुलनेत एकत्रित निव्वळ नफा १६०.२ टक्क्यांनी वाढला आहे.

आर्थिक वर्ष २०२५ च्या तिसऱ्या तिमाहीत नायकाचं कामकाजातून एकत्रित उत्पन्न २६.७४ टक्क्यांनी वाढून २२६७.२१ कोटी रुपये झालं आहे. आर्थिक वर्ष २०२४ च्या तिसऱ्या तिमाहीत ते १७८८.८० कोटी रुपये होतं. कंपनीच्या उत्पन्नात २१ टक्क्यांनी वाढ झाली आहे.

हेही वाचा: तिमाही निकालानंतर नाल्कोनं केली डिविडंडची घोषणा, शेअरचा आजचा भाव किती? पाहा!

तज्ञ काय म्हणतात…

काही तज्ञांनी कंपनीच्या तिसऱ्या तिमाहीतील कामगिरीचं कौतुक केलं आणि निरोगी वाढीसाठी कंपनी चांगल्या स्थितीत असल्याचा विश्वास व्यक्त केला.

 एफएसएन ई-कॉमर्स व्हेंचर्सनं तिसऱ्या तिमाहीत चांगली कामगिरी केली असून करोत्तर नफा ६१ टक्क्यांनी वाढून २६ कोटी रुपये झाला आहे. ब्युटी आणि फॅशन सेगमेंटमधील दमदार मागणीमुळं टॉपलाइन वाढीला हातभार लागला. नायकाची कामगिरी वाढत्या ई-कॉमर्समधील लवचिकता अधोरेखित करते आणि भविष्यातील विस्ताराचा संकेत देते, असं लक्ष्मीश्री इन्व्हेस्टमेंट अँड सिक्युरिटीजचे संशोधन प्रमुख अंशुल जैन यांनी सांगितलं.

हेन्सेक्स सिक्युरिटीजचे एव्हीपी महेश एम ओझा म्हणाले की, टेक्निकल चार्टवर नायकाच्या शेअरच्या किमतीत तेजी दिसून येत आहे. गुंतवणूकदार १८५ ते २०० रुपयांच्या नजीकच्या उद्दिष्टासाठी नायकाचे शेअर्स १६७ ते १६९ रुपये प्रति शेअर या दरानं खरेदी करू शकतात. मात्र, नवीन पोझिशन घेताना स्टॉपलॉस १५८ रुपयांपेक्षा कमी ठेवावा लागेल. नायकाचे शेअरहोल्डर्स १५८ रुपयांपेक्षा कमी स्टॉप लॉस कायम ठेवूनही शेअर होल्ड करू शकतात, असं ओझा यांनी सांगितलं.

(डिस्क्लेमर: हे वृत्त केवळ माहितीपर आहे. तज्ज्ञांची मतं, सूचना व शिफारशी त्यांच्या वैयक्तिक आहेत. हिंदुस्तान टाइम्स मराठी कोणत्याही प्रकारच्या गुंतवणुकीचा सल्ला देत नाही. त्यामुळं गुंतवणूक करण्याआधी आर्थिक सल्लागाराशी चर्चा करा.)