NBCC : बोनस शेअर देण्याचे नुसते संकेत काय दिले, नवरत्न कंपनीचे शेअर रॉकेटच्या वेगानं झेपावले!

येत्या ३१ ऑगस्ट २०२४ रोजी कंपनीच्या संचालक मंडळाची बैठक होणार आहे. या बैठकीत कंपनीचं संचालक मंडळ बोनस शेअर देण्याच्या प्रस्तावावर विचार करणार आहे, अशी माहिती एनबीसीसीनं स्टॉक एक्स्चेंजला दिली आहे. त्यानंतर कंपनीच्या शेअरमध्ये तेजी आली आहे. हा शेअर मंगळवारी १७७.६५ रुपयांवर बंद झाला होता. आज तो आणखी उसळला.

हेही वाचा: ह्या कंपनीत नक्कीच काहीतरी खास आहे! विदेशी गुंतवणूकदारांनी खरेदी केले ४.५ कोटी शेअर

सात वर्षांत दुसरा बोनस

बोनस शेअर देण्याची एनबीसीसीची ही दुसरी वेळ आहे. याआधी एनबीसीसी (इंडिया) लिमिटेडनं फेब्रुवारी २०१७ मध्ये १:२ या प्रमाणात बोनस शेअर्स दिले होते. म्हणजेच कंपनीने प्रत्येक २ शेअरमागे १ बोनस शेअर दिला होता. याशिवाय, आता कंपनीनं डिविडंड देण्याचीही घोषणा केली आहे. प्रति शेअर ६३ पैसे अंतिम लाभांश दिला जाणार आहे. ६ सप्टेंबर २०२४ ही त्यासाठी रेकॉर्ड डेट निश्चित करण्यात आली आहे. कंपनीचं बाजार भांडवल ३४,००० कोटी रुपयांच्या पुढं गेलं आहे.

कशी आहे शेअरची कामगिरी?

गेल्या वर्षभरात एनबीसीसी (इंडिया) लिमिटेडच्या शेअरमध्ये २७३ टक्क्यांहून अधिक वाढ झाली आहे. २८ ऑगस्ट २०२३ रोजी नवरत्न कंपनीचा शेअर ५०.८५ रुपयांवर होता. तोच शेअर आज, २८ ऑगस्ट २०२४ रोजी १८५ रुपयांच्याही पुढं गेला आहे. या वर्षी आतापर्यंत एनबीसीसीच्या शेअरमध्ये १३० टक्क्यांहून अधिक वाढ झाली आहे. या वर्षाच्या सुरुवातीला १ जानेवारी २०२४ रोजी एनबीसीसीचा शेअर ८१.८५ रुपयांवर होता. २८ ऑगस्ट २०२४ रोजी कंपनीचा शेअर १९२.६० रुपयांवर पोहोचला आहे. कंपनीच्या शेअर्सचा ५२ आठवड्यांचा उच्चांक १९८.३० रुपये आहे. तर, ५२ आठवड्यांचा नीचांकी स्तर ४९ रुपये आहे.

(डिस्क्लेमर : हे वृत्त केवळ माहितीपर आहे. हा कोणत्याही प्रकारचा गुंतवणुकीचा सल्ला नाही. शेअर बाजारातील गुंतवणुकीत जोखीम असते. गुंतवणूक करण्यापूर्वी आपल्या सल्लागाराचा सल्ला घ्या.)