रेल्वेकडून कंपनीला मिळालं २००० कोटींचं कंत्राट; ५ दिवसांत २८ टक्क्यांनी वाढला शेअर, तुमच्याकडं आहे का?

केर्नेक्स मायक्रोसिस्टीम्सच्या शेअरमध्ये तेजी येण्यामागचं कारण कंपनीला मिळालेलं कंत्राट आहे. रेल्वे मंत्रालयाच्या अखत्यारित असलेल्या चित्तरंजन लोकोमोटिव्ह वर्क्स या कंपनीकडून केर्नेक्सला २०४१.०४ कोटी रुपयांचं काम मिळालं आहे.

कंपनीनं ६ डिसेंबर रोजी याबाबतची माहिती दिली होती. केर्नेक्स मायक्रोसिस्टीम्स ही कंपनी रेल्वेसाठी सुरक्षा प्रणाली आणि सॉफ्टवेअर सेवांची निर्मिती आणि विक्री करते. हैदराबाद आणि इजिप्तमध्ये कंपनीचे कारखाने आहेत.

हेही वाचा: ही संधी चांगली आहे! तीन वर्षांत १७०० टक्के नफा मिळवून देणाऱ्या शेअरचा भाव अर्ध्यावर येणार

सप्टेंबर तिमाहीत कंपनीची कामगिरी कशी होती?

जुलै ते सप्टेंबर या कालावधीत कंपनीची कामगिरी शानदार राहिली आहे. कर भरल्यानंतर कंपनीला ६.८१ कोटी रुपयांचा नफा झाला आहे. पहिल्या तिमाहीत कंपनीचा नफा ३.५७ कोटी होता. तर गेल्या वर्षी सप्टेंबर तिमाहीत कंपनीला ४.५३ कोटी रुपयांचा तोटा झाला होता. सप्टेंबर तिमाहीत कंपनीचा महसूल ४१२.१९ कोटी रुपये होता.

शेअर बाजारात कंपनीची एकूण कामगिरी कशी?

गेल्या ६ महिन्यांत कंपनीच्या शेअर्सच्या किंमतीत २८७ टक्क्यांहून अधिक वाढ झाली आहे. तर पोझिशनल गुंतवणूकदारांना २ वर्षात ३५५ टक्के परतावा देण्यात हा शेअर यशस्वी ठरला आहे. गेल्या ३ वर्षांत या कंपनीच्या शेअरच्या किंमतीत १५२० टक्क्यांची वाढ नोंदवण्यात आली आहे.

हेही वाचा: इन्कम टॅक्स विभाग १,३५९ कोटींचा रिफंड देणार हे कळताच बँकेचा शेअर उसळला! भाव ६० रुपयांपेक्षाही कमी

कंपनीचा ५२ आठवड्यांचा उच्चांक १३८५.८० रुपये आणि ५२ आठवड्यांचा नीचांकी स्तर ३३३.५५ रुपये आहे.

(डिस्क्लेमर: हे वृत्त केवळ माहितीपर आहे. हिंदुस्तान टाइम्स मराठी कोणत्याही प्रकारच्या गुंतवणुकीचा सल्ला देत नाही. त्यामुळं गुंतवणूक करण्याआधी आर्थिक सल्लागाराशी चर्चा करा.)