Rule Changes From 1 February : १ फेब्रुवारीपासून नवीन महिना सुरू होत आहे. केंद्रीय अर्थमंत्री निर्मला सीतारामन याच दिवशी अर्थसंकल्प सादर करणार आहेत. याच दिवसापासून काही नवे आर्थिक बदल होणार असून त्याचा थेट परिणाम सर्वसामान्यांच्या खिशावर होऊ शकतो. पुढील महिन्यापासून एलपीजी गॅस सिलिंडरच्या किंमतीपासून यूपीआयशी संबंधित नियमांमध्ये पुन्हा एकदा मोठा बदल होणार आहे.
पुढील महिन्यापासून कोणते मोठे बदल होणार आहेत ते जाणून घेऊया...
दर महिन्याच्या पहिल्या तारखेला देशभरात एलपीजीच्या सुधारीत किंमती जाहीर केल्या जातात. तेल विपणन कंपन्या एलपीजी सिलिंडरच्या किंमती अद्ययावत करतात. त्यामुळं अर्थसंकल्पाच्या दिवशी एलपीजी सिलिंडरच्या दरात कपात होणार की वाढ होणार हे पाहणं महत्त्वाचं ठरणार आहे. सिलिंडरच्या किमतीतील बदलाचा परिणाम सर्वसामान्यांच्या खिशावर होतो. तेल विपणन कंपन्यांनी १ जानेवारी रोजी १९ किलोच्या व्यावसायिक सिलिंडरच्या किंमतीत कपात केली होती.
यूपीआयशी संबंधित नियम पुन्हा एकदा बदलणार आहेत. नॅशनल पेमेंट कॉर्पोरेशन ऑफ इंडियानं काही यूपीआय व्यवहार रोखण्याचा निर्णय घेतला आहे. यासंदर्भात परिपत्रकही काढण्यात आलं होतं. हे नवे नियम १ फेब्रुवारी २०२५ पासून लागू होतील. १ फेब्रुवारीपासून स्पेशल कॅरेक्टरसह तयार करण्यात आलेल्या आयडीद्वारे व्यवहार स्वीकारले जाणार नाहीत. एनपीसीआयच्या म्हणण्यानुसार, १ फेब्रुवारीपासून ट्रान्झॅक्शन आयडीमध्ये फक्त अल्फान्यूमेरिक कॅरेक्टर्स (अक्षरे आणि अंक) वापरले जातील. स्वतंत्र ट्रान्झॅक्शन आयडी जनरेट केल्यास पेमेंट फेल होईल.
देशातील सर्वात मोठी कार निर्माता कंपनी मारुती सुझुकी इंडिया लिमिटेडनं (एमएसआयएल) वाढता इनपुट कॉस्ट आणि ऑपरेटिंग खर्च लक्षात घेता १ फेब्रुवारीपासून आपल्या मॉडेल्सच्या किंमतीत ३२,५०० रुपयांपर्यंत वाढ करण्याची घोषणा केली आहे. ऑल्टो के१०, एस-प्रेसो, सेलेरियो, वॅगनआर, स्विफ्ट, डिझायर, ब्रेझा, अर्टिगा, इको, इग्निस, बलेनो, सियाज, एक्सएल ६, फ्रँक्स, इनव्हिक्टो, जिम्नी आणि ग्रँड व्हिटारा या मॉडेल्सच्या किंमतीत वाढ होणार आहे.
कोटक महिंद्रा बँकेनं ग्राहकांना दिल्या जाणाऱ्या सर्वसाधारण सुविधा आणि शुल्कांमध्ये बदल केले आहेत. ते १ फेब्रुवारी २०२५ पासून लागू होतील. यात मोफत एटीएम व्यवहारमर्यादेत बदल आणि विविध बँकिंग सेवां शुल्कातील बदलाचा समावेश आहे.
एअर टर्बाइन इंधनाच्या (ATF) दरात १ फेब्रुवारीपासून बदल होण्याची शक्यता आहे. तेल विपणन कंपन्या दर महिन्याच्या पहिल्या तारखेला हवाई इंधन आणि टर्बाइन इंधनाच्या किंमतीत सुधारणा करतात. म्हणजेच १ फेब्रुवारीला त्यांच्या किमतीत बदल झाला तर त्याचा थेट परिणाम विमान प्रवाशांच्या खिशावर होणार आहे.
संबंधित बातम्या