मुंबई महापालिकेनं १०६ कोटींचं कंत्राट देताच कंपनी फॉर्मात, शेअर खरेदी करण्यासाठी झुंबड

बीएसईवर क्रिस्टल इंटिग्रेटेड सर्व्हिसेस लिमिटेडचा शेअर ७५४ रुपयांवर उघडला. काही काळानंतर कंपनीचा शेअर जवळपास ६ टक्क्यांनी वधारून ७९० रुपयांवर पोहोचला. मात्र, अद्याप कंपनीचे शेअर्स ५२ आठवड्यांच्या उच्चांकी पातळीपासून दूर आहेत. कंपनीचा ५२ आठवड्यांचा उच्चांक १०२३.७५ रुपये आणि ५२ आठवड्यांचा नीचांक ६२९.७० रुपये प्रति शेअर आहे. कंपनीचे मार्केट कॅप १०८४.०८ कोटी रुपये आहे.

काय करते ही कंपनी?

क्रिस्टल इंटिग्रेटेड सर्व्हिसेस लिमिटेड ही कंपनी विविध कामांसाठी मनुष्यबळ पुरवण्याचं काम करते. मुंबई महापालिकेच्या शिक्षण व सुरक्षा विभागाला ही कंपनी मनुष्यबळ पुरवणार आहे. मुंबईतील सार्वजनिक क्षेत्राची स्थिती सुधारणं हा या प्रकल्पामागील उद्देश आहे. चालू आर्थिक वर्षाच्या पहिल्या सहामाहीत कंपनीकडं एकूण ५८० कोटी रुपयांची वर्कऑर्डर होती.

हेही वाचा: सरकारच्या एका निर्णयाचा परिणाम! टाटा समूहातील 'या' कंपनीच्या शेअरमध्ये तब्बल २० टक्क्यांची वाढ

कंपनीची सप्टेंबर तिमाही कशी होती?

सप्टेंबरच्या तिमाहीत क्रिस्टल इंटिग्रेटेड सर्व्हिसेस लिमिटेडला १०.६० कोटी रुपयांचा निव्वळ नफा झाला आहे. वार्षिक आधारावर कंपनीच्या निव्वळ नफ्यात २८ टक्क्यांची वाढ झाली आहे. चालू आर्थिक वर्षाच्या दुसऱ्या तिमाहीत कंपनीचा महसूल १४ टक्क्यांनी वाढून २६६ कोटी रुपये झाला आहे.

मार्च महिन्यात आला होता आयपीओ

क्रिस्टल इंटिग्रेटेड सर्व्हिसेस लिमिटेडचा आयपीओ ६८० ते ७१५ रुपये प्रति शेअर निश्चित करण्यात आला होता. कंपनीचा आयपीओ १४ मार्च रोजी किरकोळ गुंतवणूकदारांसाठी खुला करण्यात आला.

हेही वाचा: गुंतवणुकीची मोठी संधी! संरक्षण क्षेत्रातील 'या' ३ कंपन्यांच्या शेअर्सबद्दल दिग्गज ब्रोकरेज फर्म आशावादी

(डिस्क्लेमर: हे वृत्त केवळ माहितीपर आहे. हिंदुस्तान टाइम्स मराठी कोणत्याही प्रकारच्या गुंतवणुकीचा सल्ला देत नाही. त्यामुळं गुंतवणूक करण्याआधी आर्थिक सल्लागाराशी चर्चा करा.)