Starlink in India: भारतात सॅटेलाइटद्वारे मिळणार इंटरनेट सेवा; एअरटेलपाठोपाठ आता जिओ कंपनीची ऑफर आली

जिओ-स्टारलिंक करार: ऑफरविषयी जाणून घ्या

डेटा ट्रॅफिक बाबत जिओ ही जगातील सर्वात मोठी मोबाइल ऑपरेटर म्हणून ओळखली जाते. तर स्टारलिंक इंटरनेट हे जगातील अग्रगण्य असे 'लो अर्थ ऑर्बिट सॅटेलाइट कॉन्स्टेलेशन ऑपरेटर' म्हणून ओळखले जाते. भारतातील ग्रामीण आणि दुर्गम भागात इंटरनेट सेवा पोहोचविण्याची याचा फायदा होणार असून जिओ आपल्या रिटेल आउटलेट्स आणि ऑनलाइन स्टोअर्सवर सॅटेलाइट इंटरनेट सोल्युशन्स उपलब्ध करून देणार असल्याचे जिओने म्हटले आहे.

जिओ ग्राहकांना काय फायदा होणार?

• स्पेसएक्सबरोबरच्या करारामुळे भारतातील सर्व उद्योग, लघु आणि मध्यम व्यवसाय आणि समुदायांसाठी विश्वासार्ह इंटरनेट पूर्णपणे उपलब्ध होणार असल्याचे जिओने म्हटले आहे.
• जिओ एअर फायबर आणि जिओ फायबरमुळे स्टारलिंकचे हाय स्पीड इंटरनेट भारतात सर्वाधिक आव्हानात्मक ठिकाणी जलद गतीने आणि परवडणाऱ्या दरात इंटरनेट सेवा पोहोचेल.
• या करारामुळे देशात कुठेही राहत असलेल्या प्रत्येक भारतीयाला परवडणाऱ्या दरात हायस्पीड ब्रॉडबँड इंटरनेट उपलब्ध होईल, असं रिलायन्स जिओचे ग्रुप सीईओ मॅथ्यू ओमन यांनी सांगितलं.
• 'स्टारलिंकची इंटरनेट सेवा भारतात आणण्यासाठी स्पेसएक्सबरोबरचा आमचा करार हा आमची बांधिलकी दर्शवत असून सर्वांसाठी अखंड ब्रॉडबँड कनेक्टिव्हिटीच्या दिशेने एक क्रांतिकारी पाऊल ठरेल. जिओच्या ब्रॉडबँड इकोसिस्टममध्ये स्टारलिंकचे एकत्रीकरण करून, आम्ही आमची व्याप्ती वाढवणार आहोत. एआय-संचालित युगात हाय-स्पीड ब्रॉडबँडची विश्वासार्हता आणि सुलभता आणखी वाढवणार आहे. यामुळे देशातील नागरिक तसेच व्यवसाय सक्षम होणार आहे.
• स्पेसएक्स कंपनी जिओसोबत काम करण्यास आणि "स्टारलिंकच्या हाय-स्पीड इंटरनेट सेवांमध्ये अधिकाधिक लोक, संस्था आणि व्यवसायांना फायदा करून देण्यासाठी उत्सुक असून केंद्र सरकारकडून परवानगी मिळविण्याची वाट पाहत असल्याची माहिती स्पेसएक्सचे अध्यक्ष आणि सीओओ ग्वेन शॉटवेल यांनी दिली.

स्टारलिंक नेटवर्क काय आहे?

स्टारलिंक नेटवर्क हे जगातील पहिले आणि सर्वात मोठे सॅटेलाईट इंटरनेट प्रोव्हायडर आहे. यात ग्राहकांना ब्रॉडबँड (वाय-फाय) इंटरनेट देण्यासाठी पृथ्वीच्या खालच्या कक्षेचा वापर केला जातो. लोक त्यांच्या स्टारलिंक उपकरणांद्वारे उपग्रह नेटवर्कमध्ये टॅप करून स्ट्रीमिंग, ऑनलाइन गेमिंग, व्हिडिओ कॉलिंग इत्यादींसाठी याचा वापर करू शकतात. अमेरिकेतील उद्योगपती एलन मस्क यांच्या मालकीची स्पेसएक्स ही कंपनी स्टारलिंकच्या जगभरातील क्रियान्वयनाचे नियंत्रण करते. तथापि, भारतात स्टारलिंक सेवेची अंतिम लाँचिंग दूरसंचार प्राधिकरणांच्या आवश्यक नियामक मंजुरीवर अवलंबून असणार आहे.

भारती एअरटेलचा स्पेसएक्सशी करार

एअरटेल ही कंपनी भारतात स्टारलिंकच्या इंटरनेट सेवेची विक्री करणार असल्याचा करार झाल्याची माहिती भारती एअरटेलने ११ मार्च रोजी बीएसईवर दिलेल्या एक्स्चेंज फाइलिंगमध्ये म्हटले आहे. या करारामुळे स्टारलिंकचे मालक कंपनी असलेल्या स्पेसएक्सला भारतात स्टारलिंक इंटरनेट विकण्याचा अधिकार मिळाला आहे. शहरी तसेच ग्रामीण भागातील व्यावसायिक ग्राहक, समुदाय, शाळा आणि आरोग्य केंद्रांना जोडण्याचे कंपनीचे उद्दिष्ट आहे.