Share Split : इलेक्ट्रिक बस बनविणाऱ्या कंपनीनं केली शेअर स्प्लिटची घोषणा, एका शेअरचे किती भाग होणार? वाचा!

जेबीएम ऑटो लिमिटेडनं शेअर बाजारांना या संदर्भात माहिती दिली आहे. त्यानुसार २ रुपये अंकित मूल्य असलेल्या शेअरची २ भागांमध्ये विभागणी केली जाईल. या विभाजनानंतर कंपनीच्या शेअर्सची फेस व्हॅल्यू १ रुपये प्रति शेअरपर्यंत खाली येईल. कंपनीनं या शेअर स्प्लिटसाठी ३१ जानेवारी २०२५ ही रेकॉर्ड डेट निश्चित केली आहे. म्हणजेच त्याच दिवशी कंपनी शेअर बाजारात एक्स-स्प्लिट ट्रेड करणार आहे.

जेबीएम ऑटो लिमिटेडनं यापूर्वी २०२२ मध्ये शेअर्सचं विभाजन केलं होतं. त्यानंतर कंपनीच्या शेअर्सची अंकित किंमत प्रति शेअर ५ रुपयांवरून २ रुपयांपर्यंत खाली आली.

हेही वाचा: ‘दहा मिनिटांत डिलिव्हरी’ला रेस्टॉरंट संघटनेचा विरोध, थेट आयोगाकडं तक्रार; झोमॅटो, स्विगीचे शेअर गडगडले!

शेअर बाजारात कंपनीची कामगिरी कशी?

जेबीएम ऑटो लिमिटेडच्या गुंतवणूकदारांसाठी मागचं एक वर्ष खूपच धक्कादायक राहिलं आहे. या काळात कंपनीच्या शेअर्समध्ये मोठी घसरण झाली आहे. गेल्या सहा महिन्यांत हा शेअर ३४ टक्क्यांहून अधिक घसरला आहे. तर ज्या गुंतवणूकदारांनी वर्षभर कंपनीचे शेअर्स घेऊन ठेवले आहेत, त्यांना आतापर्यंत सुमारे २४ टक्के तोटा सहन करावा लागला आहे. आठवड्याच्या शेवटच्या दिवशी काल, १० जानेवारी रोजी जेबीएम ऑटो लिमिटेडचा शेअर १.६१ टक्क्यांनी घसरून १,४६८ रुपयांवर व्यवहार करत होता.

शेअरमध्ये दोन वर्षांत १७६ टक्क्यांची वाढ

मागचं २०२४ हे वर्ष गुंतवणूकदारांसाठी फारसं चांगलं नसेलही, मात्र २ वर्षांपासून शेअर होल्ड करून असलेल्यांना या शेअरनं १७६ टक्के नफा दिला आहे. तर, ५ वर्षात या इलेक्ट्रिक बस निर्मात्या कंपनीच्या शेअरची किंमत १२०० टक्क्यांहून अधिक वाढली आहे.

हेही वाचा: आयुर्वेदिक औषधं बनवणाऱ्या कंपनीचा आयपीओ आजपासून खुला, जीएमपी पाहून चकीत व्हाल!

(डिस्क्लेमर: हे वृत्त केवळ माहितीपर आहे. तज्ज्ञांची मतं, सूचना व शिफारशी त्यांच्या वैयक्तिक आहेत. हिंदुस्तान टाइम्स मराठी कोणत्याही प्रकारच्या गुंतवणुकीचा सल्ला देत नाही. त्यामुळं गुंतवणूक करण्याआधी आर्थिक सल्लागाराशी चर्चा करा.)