Q2 results : इन्फोसिसचे तिमाही निकाल आले! नफा होताच कंपनीनं केली भरघोस डिविडंडची घोषणा

चालू आर्थिक वर्षातील हा पहिला अंतरिम लाभांश आहे. लाभांशासाठी कंपनीनं २९ ऑक्टोबर २०२४ ही रेकॉर्ड डेट निश्चित केली आहे. तर, ८ नोव्हेंबर २०२४ रोजी डिविडंड शेअरहोल्डर्सच्या खात्यात जमा होणार आहे. मागील वर्षीच्या तुलनेत यंदाची डिविडंडची रक्कम १६.७ टक्क्यांनी जास्त आहे. इन्फोसिसचे सीएफओ जयेश संघराजका यांनी दुसऱ्या तिमाहीचे निकाल जाहीर करताना ही माहिती दिली. 

मागील वर्षी दिला होता ४६ रुपये लाभांश

याआधी इन्फोसिसनं आर्थिक वर्ष २०२४ साठी २० रुपये अंतिम लाभांश आणि प्रति शेअर ८ रुपये विशेष लाभांश जाहीर केला होता. त्यानंतर १८ रुपये प्रति शेअर लाभांश जाहीर केला होता. मागील आर्थिक वर्षात कंपनीनं एकूण ४६ रुपयांचा लाभांश जाहीर केला होता.

इन्फोसिसला किती झाला नफा?

चालू आर्थिक वर्षाच्या जुलै ते सप्टेंबर या तिमाहीत इन्फोसिसचा निव्वळ नफा ४.७ टक्क्यांनी वाढून ६,५०६ कोटी रुपये झाला आहे. गेल्या वर्षी याच तिमाहीत कंपनीला ६,२१२ कोटी रुपयांचा निव्वळ नफा झाला होता. तिमाही आधारावर कंपनीच्या नफ्यात २.२ टक्क्यांनी वाढ झाली आहे. या तिमाहीत कंपनीचा महसूल ४.२ टक्क्यांनी वाढून ४०,९८६ कोटी रुपये झाला आहे.

हेही वाचा: निव्वळ नफा १७० कोटी रुपयांनी वाढूनही बजाज ऑटोचा शेअर कोसळला! आता काय करायचं?

इन्फोसिसनं सलग दुसऱ्या तिमाहीत २०२४-२५ या आर्थिक वर्षातील कमाईचं उद्दिष्ट वाढवलं आहे. आता कंपनीला चालू आर्थिक वर्षात (२०२४-२५) ३.७५ ते ४.५० टक्के महसुली वाढीची अपेक्षा आहे. हे उद्दिष्ट मागील तिमाहीत दिलेल्या तीन ते चार टक्क्यांच्या उद्दिष्टापेक्षा अधिक आहे.

शेअरची स्थिती काय?

तिमाही निकालाच्या पार्श्वभूमीवर इन्फोसिसच्या शेअरमध्ये गुरुवारी वादळी वाढ झाली. आठवड्याच्या चौथ्या दिवशी गुरुवारी हा शेअर एनएसईवर २.८४ टक्क्यांनी वधारून १९७४.५५ रुपयांवर पोहोचला. शेअरचा ५२ आठवड्यांचा उच्चांक १९९१.४५ रुपये आहे. तर इन्फोसिसच्या शेअरचा ५२ आठवड्यांचा नीचांक १३५१.६५ रुपये आहे. मागील सहा महिन्यांत कंपनीनं गुंतवणूकदारांना ३९.१३ टक्के परतावा दिला आहे.

(डिस्क्लेमर: हे वृत्त केवळ माहितीपर आहे. हा कोणत्याही प्रकारच्या गुंतवणुकीचा सल्ला नाही. शेअर बाजारातील गुंतवणुकीत जोखीम असते. त्यामुळं गुंतवणूक करण्याआधी आर्थिक सल्लागाराशी चर्चा करा.)