अजून काही वर्षे... भारत बनणार जगातील तिसरी सर्वात मोठी अर्थव्यवस्था, एस अँड पी ग्लोबलचा अंदाज
चालू आर्थिक वर्षात भारतीय अर्थव्यवस्थेचा विकासदर ६.७ टक्के राहील, असा अंदाज रेटिंग एजन्सी एस अँड पी ग्लोबलने व्यक्त केला आहे.
जीडीपी अंदाजाची आकडेवारी : जर सर्व काही सुरळीत राहिले तर आर्थिक वर्ष 2030-31 पर्यंत भारत जगातील तिसरी सर्वात मोठी अर्थव्यवस्था बनेल. एस अँड पी ग्लोबलने हा अंदाज वर्तवला आहे. रेटिंग एजन्सी एस अँड पी ग्लोबलने म्हटले आहे की, चालू आर्थिक वर्षात भारतीय अर्थव्यवस्थेचा विकास दर ६.७ टक्के राहण्याची शक्यता आहे.
आर्थिक वर्ष २०२३-२४ मध्ये ८.२ टक्के वाढीचा दर असल्याने व्यावसायिक व्यवहार, लॉजिस्टिक्समध्ये सुधारणा, खासगी क्षेत्रातील गुंतवणुकीला प्रोत्साहन आणि सार्वजनिक भांडवलावरील अवलंबित्व कमी करण्यासाठी सातत्याने सुधारणा करणे आवश्यक आहे, असे रेटिंग एजन्सी एस अँड पी ग्लोबलने गुरुवारी एका अहवालात म्हटले आहे. मजबूत वाढीच्या शक्यता आणि चांगल्या नियमनामुळे शेअर बाजार गतिशील, स्पर्धात्मक राहण्याची अपेक्षा या अहवालात व्यक्त करण्यात आली आहे. या अहवालानुसार, प्रमुख उदयोन्मुख बाजार निर्देशांकांमध्ये भारत सामील झाल्यापासून भारत-सरकारी रोख्यांमधील परकीय गुंतवणूक वाढली आहे. त्यात आणखी वाढ होण्याची शक्यता आहे.
भारताचा सुमारे ९० टक्के व्यापार सागरी मार्गाने होतो, त्यामुळे मोठ्या वस्तूंची वाढती निर्यात आणि आयात व्यवस्थापित करण्यासाठी मजबूत बंदर पायाभूत सुविधांची आवश्यकता असल्याचे या अहवालात म्हटले आहे. त्याचबरोबर भारताला देशांतर्गत ऊर्जेच्या वाढत्या मागणीला सामोरे जावे लागत आहे. अशा परिस्थितीत नवीकरणीय आणि कमी उत्सर्जन इंधनासह इतर तंत्रज्ञानाचा विचार केला जाऊ शकतो. त्याच वेळी, ऊर्जा सुरक्षा आपल्या ऊर्जा संक्रमण योजनांसह संतुलित केली पाहिजे.
या अहवालानुसार, पायाभूत सुविधा आणि उत्पादकता सुधारण्यासाठी शेती प्रगत तंत्रज्ञान आणि नवीन धोरणांवर अवलंबून असेल. अन्नसुरक्षा आणि आर्थिक स्थैर्य सुनिश्चित करण्यासाठी सिंचन, साठवणूक आणि पुरवठा वितरण यासारख्या महत्त्वाच्या पायाभूत सुविधांच्या समस्याहाताळणे आवश्यक आहे. आर्टिफिशियल इंटेलिजन्सच्या वापरामुळे आर्थिक वृद्धी वाढू शकते, असे अहवालात म्हटले आहे.
