Dividend Stock : वेदांता ग्रुपच्या कंपनीचा धडाका, एका शेअरवर १९ रुपये लाभांश जाहीर, तुम्हाला किती मिळणार?

यापूर्वी कंपनीनं प्रति शेअर १० रुपये अंतरिम लाभांश जाहीर केला होता. हिंदुस्तान झिंकनं बीएसईला या संदर्भात माहिती दिली आहे. त्यानुसार, संचालक मंडळानं २०२४-२५ या आर्थिक वर्षासाठी २ रुपये प्रति शेअर अंकित मूल्यावर ९.५० टक्के अंतरिम लाभांश जाहीर केला आहे. लाभांशापोटी द्यावी लागणारी रक्कम ८,०२८.११ कोटी रुपये इतकी आहे.

कंपनीच्या शेअरच्या भावावर परिणाम

लाभांशाच्या वृत्तामुळं आज हिंदुस्तान झिंकचा शेअर घेण्यासाठी गुंतवणूकदारांची झुंबड उडाली. आठवड्याच्या दुसऱ्या दिवशी कंपनीचा शेअर जवळपास ३ टक्क्यांनी वधारला आणि ५१३ रुपयांच्या पातळीवर पोहोचला. २२ मे २०२४ रोजी शेअरचा भाव ८०७ रुपये होता ही ५२ आठवड्यांच्या उच्चांकी पातळी होती. तर, शेअरचा ५२ आठवड्यांचा नीचांकी स्तर २८५ रुपये आहे. ही किंमत या वर्षी मार्चमध्ये होती.

३२०० कोटी रुपयांची उभारणी

हिंदुस्तान झिंकच्या शेअर्स विक्रीच्या ऑफरमधून सुमारे ३,२०० कोटी रुपये जमा झाले आहेत. वेदांता समूहातील कंपनी हिंदुस्तान झिंकच्या समभागांच्या विक्रीच्या ऑफरला किरकोळ आणि संस्थात्मक गुंतवणूकदारांचा उत्स्फूर्त प्रतिसाद मिळाला आहे. या विक्रीतून वेदांताला सुमारे ३,२०० कोटी रुपये मिळतील, असा अंदाज सूत्रांनी व्यक्त केला आहे.

ओएफएसमधून उभारलेल्या पैशातून काय होणार?

ओएफएस (Offer for sale)मधून मिळणाऱ्या उत्पन्नाचा वापर कंपनी आपला ताळेबंद संतुलित करण्यासाठी आणि विस्तार प्रकल्पांमध्ये गुंतवणुकीसाठी करणार आहे. गेल्या महिन्यात पात्र संस्थात्मक वाटपातून ८,५०० कोटी रुपयांची भर पडल्यानं वेदांता समूह आणि हिंदुस्तान झिंक या दोन्ही कंपन्यांचे कर्ज कमी होण्यास मदत होणार आहे. किरकोळ गुंतवणुकदारांसाठी इश्यू साइज ५१.४४ लाख शेअर्सची होती, तर एकूण ९३.८२ लाख शेअर्स विक्रीसाठी काढण्यात आले होते. 

हेही वाचा : दहावी पास व्यक्ती अमेरिकेत जाऊन बनला करोडपती? जाणून घ्या उद्योजकाच्या यशाची कहाणी

हिंदुस्तान झिंकमधील वेदांताचा हिस्सा ६३ टक्क्यांच्या वर

सूत्रांनी दिलेल्या माहितीनुसार, संस्थात्मक गुंतवणूकदारांसाठी ४.६२ कोटी शेअर्स राखीव ठेवण्यात आले होते, तर एकूण संस्थात्मक खरेदी ६.३६ कोटी शेअर्स राखीव होते. १६ ते १९ ऑगस्ट दरम्यान चाललेल्या ओएफएस प्रक्रियेनंतर हिंदुस्तान झिंकमधील वेदांताचा हिस्सा ६३.४२ टक्क्यांवर आला आहे.

(डिस्क्लेमर : हे वृत्त केवळ माहितीपर आहे. हा कोणत्याही प्रकारचा गुंतवणुकीचा सल्ला नाही. शेअर बाजारातील गुंतवणुकीत जोखीम असते. गुंतवणूक करण्यापूर्वी आपल्या सल्लागाराचा सल्ला घ्या. )