विलिनीकरणाची बातमी येताच गुजरात गॅसचे शेअर रॉकेटच्या वेगानं झेपावले! आता काय करायचं?

काय आहे नेमकी योजना?

जीएसपीसी आणि जीएसपीएल यांच्या गुजरात गॅसमधील विलिनीकरणानंतर जीएसपीएल ट्रान्समिशन लिमिटेड (GTL) नावाची नवीन पारेषण आणि वितरण कंपनी अस्तित्वात येणार आहे. या कंपनीचे कालांतरानं विघटन करून ती शेअर बाजारात सूचीबद्ध करण्याची योजना आहे. या योजनेअंतर्गत जीएसपीसीच्या भागधारकांना प्रत्येक ३०५ शेअरमागे गुजरात गॅसचे १० शेअर मिळणार आहेत. तर, जीएसपीएलच्या भागधारकांना प्रत्येक १३ शेअरमागे गुजरात गॅसचे १० शेअर मिळणार आहेत. जीएसपीसी एनर्जी लिमिटेड (GEL) चं देखील गुजरात गॅसमध्ये विलिनीकरण होणार आहे.

पहिल्या टप्प्यातील फेररचनेनंतर गुजरात गॅसधील गॅस ट्रान्समिशन व्यवसायाचे जीएसपीएल ट्रान्समिशन लिमिटेड (GTL) या नव्यानं स्थापन झालेल्या कंपनीत विलीनीकरण करण्यात येणार आहे. गुजरात गॅसच्या भागधारकांना प्रत्येक ३ शेअरमागे नव्यानं अस्तित्वात आलेल्या जीटीएलचा १ शेअर दिला जाणार आहे.

किती वाढला गुजरात गॅसचा शेअर?

गुजरात गॅसच्या शेअरमध्ये आज १० टक्क्यांपेक्षा जास्त वाढ झाली आहे. या कंपनीच्या शेअरची कामगिरी मागच्या वर्षभरात उत्तम राहिली आहे. मागील एका वर्षात शेअरनं गुंतवणूकदारांना ४७ टक्के नफा मिळवून दिला आहे. तर, यंदाच्या कॅलेंडर वर्षात हा शेअर सुमारे ३८ टक्क्यांनी वाढला आहे.

हेही वाचा: रिलायन्स इंडस्ट्रीज देणार प्रत्येक शेअरवर बोनस, आता गुंतवणूक करावी का? एक्सपर्ट्स म्हणतात…

मार्केट एक्सपर्ट्स काय म्हणतात…

या सगळ्या घडमोडी मूल्यवर्धक असतील असा अंदाज अँटिक स्टॉक ब्रोकिंगनं व्यक्त केला आहे. या विलीनीकरणाचा उद्देश प्रामुख्यानं कंपन्यांच्या रचनेत सुलभता आणणं हा आहे. विशेषत: गुजरात स्टेट पेट्रोनेट लिमिटेड (GSPL) कडे सध्या असलेल्या गुजरात गॅसच्या समभागांचे मूल्य अनलॉक करणं हा एक उद्देश आहे, असं अँटिक स्टॉक ब्रोकिंगचं म्हणणं आहे. हे विलीनीकरण गुजरात गॅससाठी खूपच लाभदायी असेल. गुजरात गॅसचा शेअर ७२६ रुपयांपर्यंत जाण्याची अपेक्षा असून तो खरेदी करण्याचा सल्ला अँटिक ब्रोकिंगनं दिला आहे.

उत्पन्नात चढउतार होण्याची शक्यता

जीएसपीसीला सध्या देण्यात येणारे ट्रेडिंग मार्जिन काढून टाकल्यास गुजरात गॅसला फायदा होणार आहे, परंतु ट्रेडिंग व्यवसायाचा समावेश केल्यामुळं उत्पन्नातील अस्थिरता वाढेल, असं जेफरीज इंडिया लिमिटेडच्या विश्लेषकांचं मत आहे.

(डिस्क्लेमर: वरील लेखात व्यक्त केलेली मते आणि शिफारशी विश्लेषक व ब्रोकिंग कंपन्यांची व्यक्तिगत मतं आहेत, हिंदुस्तान टाइम्स मराठीची नाहीत. हा कुठल्याही प्रकारच्या गुंतवणुकीचा सल्ला नाही. गुंतवणूक करण्याआधी आपल्या आर्थिक सल्लागाराशी चर्चा करूनच निर्णय घ्यावा.)