ट्रम्प यांच्या टॅरिफ बॉम्बमुळं गुंतवणूकदारांचा कल बदलला! सोन्याच्या दरात वाढ
डोनाल्ड ट्रम्पच्या चीनवरील आयात शुल्क वाढीमुळे गुंतवणूकदारांनी सोन्यात मोठी गुंतवणूक केली आहे. सोने 3,089.17 डॉलर प्रति औंसवर पोहोचले, तर भारतीय बाजारात 24 कॅरेट सोने 90,161 रुपये प्रति 10 ग्रॅम झाले.
अमेरिकेचे राष्ट्राध्यक्ष डोनाल्ड ट्रम्प यांनी चीनवरील शुल्क (आयात शुल्क) वाढवण्याच्या निर्णयानंतर गुंतवणूकदारांनी सोन्यात मोठी गुंतवणूक केली आणि पुन्हा एकदा सोन्याच्या दरात तेजी पाहायला मिळत आहे. स्पॉट गोल्ड चा भाव गुरुवारी 0.2 टक्क्यांनी वाढून 3,089.17 डॉलर प्रति औंस झाला. त्याचवेळी अमेरिकेतील सोन्याचा वायदा ०.८ टक्क्यांनी वधारून ३,१०४.९० डॉलरवर पोहोचला. यापूर्वी स्पॉट गोल्ड२.६ टक्के आणि फ्युचर्स ३ टक्क्यांनी वधारले होते. तर, 3 एप्रिल रोजी सोने 3,167.57 डॉलरच्या विक्रमी पातळीवर होते.
महावीर जयंतीनिमित्त भारतीय शेअर बाजार आणि कमॉडिटी बाजार १० एप्रिल रोजी बंद राहणार आहेत. मात्र, मल्टी कमोडिटी एक्स्चेंजवर (एमसीएक्स) सायंकाळी पाच वाजता कमॉडिटी ट्रेडिंग सुरू होईल.
या वर्षी आतापर्यंत सोने 14421 रुपये प्रति 10 ग्रॅमने वधारले आहे, देशांतर्गत सराफा बाजाराबद्दल बोलायचे झाले तर या वर्षी आतापर्यंत सोने 14421 रुपये प्रति 10 ग्रॅम ने महाग झाले आहे. तर चांदीच्या दरात 4652 रुपयांची वाढ झाली आहे. एप्रिलमध्ये सोन्याच्या दरात 997 रुपयांनी तर चांदीच्या दरात 10265 रुपयांची घसरण झाली आहे.
भारतीय सराफा बाजारात सोन्याच्या दरात पुन्हा एकदा १६११ रुपयांची वाढ झाली आहे. आयबीजेएने दिलेल्या माहितीनुसार, बुधवारी 24 कॅरेट सोन्याचा भाव 1611 रुपयांनी वाढून 90161 रुपये प्रति 10 ग्रॅम झाला. चांदीही ३०६ रुपयांनी वधारून ९०,६६९ रुपयांवर पोहोचली. एमसीएक्सवर बुधवारी सोन्याचा भाव 80 रुपयांनी (0.09 टक्के) घसरून 89,724 रुपये प्रति 10 ग्रॅम वर बंद झाला. दिवसभरात तो ९०,८५३ रुपयांवर पोहोचला. चांदी 2,856 रुपये (3.22%) वाढून 91,600 रुपये प्रति किलो झाली.
सोने का वाढत आहे?
ट्रम्प यांनी चीनमधून होणाऱ्या आयातीवरील शुल्क १०४ टक्क्यांवरून १२५ टक्क्यांपर्यंत वाढवले, पण इतर देशांवरील शुल्कवाढ ९० दिवसांसाठी पुढे ढकलली. या शुल्कामुळे महागाई वाढेल आणि अर्थव्यवस्थेला फटका बसेल, अशी भीती गुंतवणूकदारांनी व्यक्त केली आहे. त्यामुळे त्यांनी शेअर्सऐवजी सोन्यात गुंतवणूक केली. रॉयटर्सच्या म्हणण्यानुसार, अमेरिका-चीन व्यापार तणाव, महागाईची भीती आणि मध्यवर्ती बँकांनी सोने खरेदी केल्यामुळे 2025 मध्ये सोने 400 डॉलरपेक्षा जास्त वाढले आहे.
संबंधित बातम्या