IPL मधील गुजरात टायटन्स संघावर गौतम अदानी यांची नजर, टोरेंट ग्रुपशी द्यावी लागणार टक्कर

इकॉनॉमिक टाइम्सनं सूत्रांच्या हवाल्यानं या संदर्भातील वृत्त दिलं आहे. सीव्हीसी आयपीएल फ्रँचायझीमधील मोठा हिस्सा विकण्यास तयार आहे. भारतीय क्रिकेट नियामक मंडळाचा (BCCI) लॉक-इन कालावधी फेब्रुवारी २०२५ मध्ये संपत आहे. त्यानंतर नव्या संघांना हिस्सेदारी विकता येणार आहे.

गुजरात टायटन्स ही तीन वर्षे जुनी फ्रँचायझी आहे. तिचं मूल्य एक अब्ज डॉलर ते दीड अब्ज डॉलरच्या दरम्यान असू शकते. सीव्हीसीनं २०२१ मध्ये ही फ्रँचायझी ५,६२५ कोटी रुपयांना खरेदी केली.

२०२१ मध्ये अहमदाबाद आयपीएल फ्रँचायझी विकत घेण्याची संधी गमावल्यानंतर अदानी आणि टोरेंट समूह दोघेही गुजरात टायटन्समध्ये जास्तीत जास्त हिस्सा खरेदी करण्याच्या शर्यतीत आहेत, अशी माहिती या प्रकरणाशी संबंधित एका अधिकाऱ्यानं दिली.  फ्रँचायझीमधील आपल्या हिस्सेदारीतून मोठं भांडवल उभारण्याची सीव्हीसीसाठी ही एक चांगली संधी आहे. २०२१ मध्ये सीव्हीसी समूहानं ५,१०० कोटी रुपयांची बोली लावली होती, तर टोरेंटनं ४,६५३ कोटी रुपयांची बोली लावली होती.

आणखी एका अधिकृत माहितीनुसार, 'आयपीएलच्या गुजरात फ्रँचायझीवर अनेक गुंतवणूकदारांचं बारीक लक्ष आहे. कारण, या फ्रँचायजीनं अल्पावधीतच स्वत:ला प्रस्थापित करण्यात यश मिळवलं आहे. गौतम अदानी यांनी यापूर्वीच महिला प्रीमियर लीग (WPL) आणि यूएई-बीआरडी इंटरनॅशनल लीग टी-२० मधील संघ विकत घेऊन क्रिकेटमध्ये गुंतवणूक केली आहे. २०२३ मध्ये अदानी समूहानं १,२८९ कोटी रुपयांची टॉप बोली लावून डब्ल्यूपीएलची अहमदाबाद फ्रँचायझी जिंकली होती.

हेही वाचा: आर्थिक पाहणी अहवाल म्हणजे काय? तो महत्त्वाचा का असतो? कोण आणि कधी सादर करतं?

गुजरात टायटन्सचे सीओओ अरविंदर सिंग म्हणाले की, फ्रँचायझीला पुढील मीडिया राइट्स सायकलमध्ये नफा मिळेल. मूळ दहा फ्रँचायझींनाही नफ्यात येण्यासाठी ४ ते ५ वर्षे लागली. आम्ही केवळ नफाच कमवणार नाही तर आमची ब्रँड व्हॅल्यू देखील वेगानं वाढेल.'