जबरदस्त तिमाही निकालानंतर सरकारी कंपनीच्या शेअरमध्ये तेजी, एक्सपर्ट्स म्हणतात…
Gail India Share Price : जोरदार तिमाही निकालामुळं सरकारी कंपनी गेल इंडियाच्या शेअरवर गुंतवणूकदारांच्या उड्या पडू लागल्या आहेत. हा शेअर २५० पार जाण्याची शक्यता तज्ज्ञांनी व्यक्त केली आहे.
Gail (India) share : सरकारी ऊर्जा कंपनी गेलचे शेअर्स आज प्रचंड चर्चेत होते. आर्थिक वर्ष २०२५ च्या दुसऱ्या तिमाहीच्या जबरदस्त निकालानंतर गेल इंडियाच्या शेअरमध्ये बुधवारी ६ टक्क्यांहून अधिक वाढ झाली. कंपनीचा शेअर आज इंट्राडे २०९.९५ रुपयांच्या उच्चांकी पातळीवर पोहोचला.
गेलचा निव्वळ नफा सप्टेंबर तिमाहीत १० टक्क्यांनी वाढून २,६८९.६७ कोटी रुपये झाला आहे. जागतिक ब्रोकरेज कंपनी जेफरीजने २४० रुपयांच्या टार्गेट प्राइससह शेअरवरील रेटिंग 'बाय' करण्यासाठी अपग्रेड केले आहे. दुसरीकडे, मॉर्गन स्टॅनलीने या शेअरसाठी २५८ रुपयांचे टार्गेट प्राइस ठेवून कंपनीवर अधिक वजनदार भूमिका कायम ठेवली. भारताचे राष्ट्रपती यांच्याकडे कंपनीचे ३,३८,७५,७६,८६४ शेअर्स आहेत. हे प्रमाण ५१.९२ टक्के इतके आहे.
गॅस ट्रान्समिशन व्यवसायातून मिळणाऱ्या महसुलात झालेली वाढ आणि पेट्रोकेमिकल्स व्यवसायात झालेली सुधारणा यामुळे कंपनीच्या मार्केटिंग मार्जिनमधील घसरण भरून निघाली असल्याचे कंपनीने मंगळवारी सांगितले. गेल्या वर्षी याच तिमाहीत कंपनीला २,४४२.१८ कोटी रुपयांचा निव्वळ नफा झाला होता. भारतातील सर्वात मोठी नैसर्गिक वायू कंपनी गेल इंडिया लिमिटेडने शेअर बाजाराला दिलेल्या माहितीनुसार, सप्टेंबर तिमाहीत कंपनीचे परिचालन उत्पन्न जवळपास ३३,९८१.३३ कोटी रुपयांवर स्थिर राहिले आहे.
गेलचे अध्यक्ष आणि व्यवस्थापकीय संचालक (CMD) संदीप कुमार गुप्ता म्हणाले की, चालू आर्थिक वर्षात पेट्रोकेमिकल्स विभाग बऱ्यापैकी नफ्यात राहण्याची अपेक्षा आहे. सप्टेंबर तिमाहीत कंपनीने प्रामुख्याने पाइपलाइन आणि पेट्रोकेमिकल्सवर १,८८५ कोटी रुपयांचा भांडवली खर्च केला, ज्यामुळे ३० सप्टेंबरपर्यंत कंपनीचा एकूण भांडवली खर्च ३,५४४ कोटी रुपयांवर पोहोचला.
(डिस्क्लेमर: हे वृत्त केवळ माहितीपर आहे. हा कोणत्याही प्रकारच्या गुंतवणुकीचा सल्ला नाही. त्यामुळं गुंतवणूक करण्याआधी आर्थिक सल्लागाराशी चर्चा करा.)
