Firstcry IPO : फर्स्टक्रायच्या आयपीओची शेअर मार्केटमध्ये दणक्यात एन्ट्री; पहिल्याच दिवशी ४० ते ५० टक्क्यांचा नफा

आयपीओचा तपशील

ब्रेनबिझ सोल्यूशन्स लिमिटेडचा आयपीओ ६ ऑगस्ट रोजी सब्सक्रिप्शनसाठी खुला झाला. तर, तीन दिवसांनी ८ ऑगस्ट रोजी बंद झाला. हा आयपीओ ५ ऑगस्ट रोजी मोठ्या गुंतवणूकदारांच्या सब्सक्रिप्शनसाठी खुला करण्यात आला.

ई-कॉमर्स प्लॅटफॉर्म फर्स्टक्रायची मूळ कंपनी ब्रेनबिझ सोल्यूशन्सचा आयपीओ बोलीच्या तिसऱ्या आणि शेवटच्या दिवशी १२.२२ पट सब्सक्राइब झाला. एनएसईच्या आकडेवारीनुसार, ४,१९४ कोटी रुपयांच्या सुरुवातीच्या समभाग विक्रीत ६०,६४,२९,४७२ शेअर्ससाठी बोली लावण्यात आली होती, तर ४,९६,३९,००४ शेअर्ससाठी ऑफर देण्यात आली होती. पात्र संस्थात्मक खरेदीदार (QIB) श्रेणीत हा आयपीओ १९.३० पट, तर बिगर संस्थात्मक गुंतवणूकदार श्रेणीत ४.६८ पट सब्सक्राइब झाला. किरकोळ वैयक्तिक गुंतवणूकदारांचा (RII) हिस्सा २.३१ पट वाढला. ब्रेनबिझ सोल्यूशन्सनं अँकर गुंतवणूकदारांकडून १,८८६ कोटी रुपये गोळा केले आहेत.

हेही वाचा: हिंडेनबर्गच्या रिपोर्टचा झटका! ९० रुपयांपर्यंत खाली आला अदानीच्या कंपनीचा शेअर, तुमच्याकडं आहे का?

४१९४ कोटींचा आयपीओ

आयपीओसाठी प्राइस बँड ४४० ते ४६५ रुपये प्रति शेअर निश्चित करण्यात आला होता. पुण्यातील ब्रेनबिझ सोल्यूशन्सच्या आयपीओमध्ये १,६६६ कोटी रुपयांच्या नव्या इक्विटी शेअर्सचा तर, विद्यमान भागधारकांच्या २,५२८ कोटी रुपयांच्या ५.४४ कोटी शेअर्सच्या ऑफर फॉर सेलचा समावेश होता. त्यामुळं या आयपीओची एकूण इश्यू साइज ४,१९४ कोटी रुपये होती.

(डिस्क्लेमर: हे वृत्त माहितीपर आहे. हा कोणत्याही प्रकारचा गुंतवणुकीचा सल्ला नाही. शेअर बाजारातील गुंतवणुकीत जोखीम असते. त्यामुळं गुंतवणुकीचा कोणताही निर्णय घेण्याआधी आपल्या आर्थिक सल्लागाराशी चर्चा करावी.)