Share Market News Today : मागच्या एका वर्षात गुंतवणूकदारांना मालामाल करणारा डिक्सन टेक्नॉलॉजीजच्या शेअरनं आज जोरदार आपटी खाल्ली. हा शेअर आज सकाळच्या सत्रात तब्बल १३ टक्क्यांहून जास्त कोसळला. सकाळी ११.१६ च्या सुमारास हा शेअर २३४९.३५ रुपयांनी घसरून एनएसईवर १५२१०.१० रुपयांवर ट्रेड करत होता.
डिक्सन टेक्नॉलॉजीजच्या शेअरच्या घसरणीमागे एक मोठं कारण आहे. ब्रोकरेज फर्म जेफरीजच्या मते, कंपनीच्या शेअर्समध्ये घसरण होऊ शकते. ब्रोकरेज कंपनीनं कंपनीच्या तिमाही निकालाच्या पार्श्वभूमीवर मूल्यांकनाबद्दल चिंता व्यक्त केली होती.
सोमवार, २० जानेवारी रोजी डिसेंबर तिमाहीचे निकाल जाहीर झाल्यानंतर इलेक्ट्रॉनिक उपकरणांची निर्मिती करणाऱ्या या कंपनीला जेफरीजनं 'अंडरपरफॉर्म' रेटिंग दिलं आहे. जेफरीजनं 'अंडरपरफॉर्म' रेटिंग १२,६०० रुपयांच्या टार्गेट प्राइससह दिलं आहे. सोमवारच्या १७५५४.४५ रुपयांच्या बंद किंमतीपेक्षा हे टार्गेट २८ टक्के कमी दिसत आहे.
गोल्डमन सॅक्सचे डिक्सनवर 'सेल' रेटिंग असून टार्गेट प्राइस १०,२४० रुपये आहे, जे जेफरीजने शेअरसाठी सांगितलेल्या किमतीपेक्षा कमी आहे. सोमवारच्या बंद किमतीच्या तुलनेत ही ४१ टक्क्यांची घसरण आहे. डिक्सन टेक्नॉलॉजीजनं आपल्या कोअर मोबाइल व्यवसायात १९० टक्के वाढ नोंदविली. ही वाढ कंपनीच्या टॉपलाइनमध्ये जवळजवळ ९० टक्के योगदान देते. कंपनीचे इतर बहुतांश निकष अपेक्षेप्रमाणे होते.
मोबाइल पीएलआयची मुदत २०२६ मध्ये संपत असून ग्राहकांच्या इलेक्ट्रॉनिक विक्रीत वार्षिक आधारावर ३२ टक्के घट झाली आहे, असे जेफरीजने एका नोटमध्ये म्हटले आहे. जेफरीज यांच्या मते, २०२६ या आर्थिक वर्षाच्या १०७ पट किंमत-कमाईमुळे डिक्सनचे रिस्क-रिवॉर्ड वाढलं आहे आणि यावरून त्यांचा 'अंडरपरफॉर्मन्स' दिसून येतो.
दुसरीकडं, सीएलएसएनं शेअरला 'आउटपरफॉर्म' रेटिंग दिलं असून १८,८०० रुपयांचं टार्गेट प्राइस आहे. ब्रोकरेजनं म्हटलं आहे की हा मोबाइल सेगमेंट आहे जो डिक्सनच्या मध्यम कालावधीत वाढीस चालना देईल. आर्थिक वर्ष २०२४ ते २०२७ दरम्यान सीएलएसएनं डिक्सनचा महसूल, व्याज, कर, अवमूल्यन आणि अमोर्टायझेशन (एबिटडा) आणि निव्वळ नफा अनुक्रमे ५९ टक्के, ५८ टक्के आणि ६७ टक्के चक्रवाढ वार्षिक विकास दरानं (सीएजीआर) वाढण्याची अपेक्षा व्यक्त केली आहे.
संबंधित बातम्या