आयडीएफसी बँकेनं नोंदवला ५२ आठवड्यांचा नीचांक, तिमाही नफ्यात घट झाल्याचा परिणाम

चालू आर्थिक वर्षाच्या सप्टेंबर तिमाहीत बँकेच्या नफ्यात ७३ टक्क्यांनी घट झाली आहे. नफ्यात मोठी घसरण झाल्यानंतर जागतिक ब्रोकरेज कंपन्यांनाही धक्का बसला आणि त्यांनी आयडीएफसी फर्स्ट बँकेच्या शेअरच्या किमतीचे लक्ष्य कमी केले. 

ब्रोकरेज फर्म नुवामाने दुसऱ्या तिमाहीच्या निकालानंतर शेअरवर 'होल्ड' रेटिंग कायम ठेवले आहे. मात्र, टार्गेट प्राइस ७२ रुपयांवरून ६० रुपये करण्यात आली आहे. गेल्या अनेक ट्रेडिंग दिवसांपासून हा शेअर मंदावलेला आहे. गेल्या पाच दिवसांत त्यात ८ टक्के, एका महिन्यात १३ टक्के आणि सहा महिन्यांत २० टक्क्यांनी घसरण झाली आहे. या वर्षी आतापर्यंत हा शेअर २६ टक्क्यांनी घसरला आहे. वर्षभरात हा शेअर २१ टक्क्यांनी घसरला आहे.

आयडीएफसी फर्स्ट बँकेचा निव्वळ नफा चालू आर्थिक वर्षातील जुलै ते सप्टेंबर या कालावधीत ७३ टक्क्यांनी घसरून ११,७४६ कोटी रुपयांवर आला आहे. गेल्या वर्षी याच तिमाहीत कंपनीला ७५१ कोटी रुपयांचा निव्वळ नफा झाला होता. आयडीएफसी फर्स्ट बँकेने शेअर बाजाराला दिलेल्या माहितीनुसार, या तिमाहीत कंपनीचे एकूण उत्पन्न १०,६८४ कोटी रुपये झाले आहे. बँकेचे व्याज उत्पन्न वाढून ८,९५७ कोटी रुपयांवर पोहोचले आहे, जे गेल्या आर्थिक वर्षाच्या याच कालावधीत ७,३५६ कोटी रुपये होते. निव्वळ व्याज उत्पन्न (NII) गेल्या वर्षीच्या दुसऱ्या तिमाहीतील ३,९५० कोटी रुपयांवरून ४,७८८ कोटी रुपयांवर पोहोचले आहे.

मालमत्तेच्या गुणवत्तेचा विचार केल्यास बँकेची सकल अनुत्पादक मालमत्ता (NPA) सप्टेंबर २०२४ अखेरीस एकूण कर्जाच्या १.९२ टक्क्यांवर आली आहे. गेल्या वर्षी ती २.११ टक्के होती. त्याचप्रमाणे निव्वळ एनपीए किंवा बुडीत कर्जे गेल्या आर्थिक वर्षाच्या दुसऱ्या तिमाहीअखेर ०.६८ टक्क्यांवरून ०.४८ टक्क्यांवर आली आहेत.

(डिस्क्लेमर: हे वृत्त केवळ माहितीपर आहे. हा कोणत्याही प्रकारच्या गुंतवणुकीचा सल्ला नाही. शेअर बाजारातील गुंतवणुकीत जोखीम असते. त्यामुळं गुंतवणूक करण्याआधी आर्थिक सल्लागाराशी चर्चा करा.)