BHFL ipo listing : बजाज हाऊसिंग फायनान्सच्या शेअरचा बाजारात धुमाकूळ; पहिल्याच दिवशी गुंतवणूकदारांचे पैसे दुप्पट

व्यवस्थापनांतर्गत मालमत्तेच्या (AUM) निकषानुसार देशातील दुसऱ्या क्रमांकाची गृहकर्ज वित्तपुरवठादार कंपनी असलेल्या बजाज हाऊसिंग फायनान्सचा आयपीओ मागील आठवड्यात दाखल झाला होता. बजाज समूहाचं नाव, कंपनीचा आतापर्यंतचा ट्रॅक रेकॉर्ड आणि आर्थिक स्थिती मजबूत असल्यामुळं आयपीओला तुफान प्रतिसाद मिळाला. 

बजाज हाऊसिंग फायनान्सला आयपीओचा आकार ६,५६० कोटी रुपयांचा होता. प्रत्यक्षात हा आयपीओ जवळपास ६७ पट सब्सक्राइब झाला. त्यासाठी सुमारे ३८.६० अब्ज डॉलर्सची बोली लागली होती. लिस्टिंगच्या आधी कंपनीचा शेअर इश्यू प्राइसच्या १२० टक्के जीएमपीसह व्यवहार करत होता. 

मध्यम व दीर्घकालीन गुंतवणुकीचा सल्ला

आयपीओमधून मिळणारी निव्वळ कमाई कंपनी भविष्यातील कर्जाशी संबंधित व्यावसायिक गरजा पूर्ण करण्यासाठी वापरणार आहे. कंपनीची एकूण परिस्थिती पाहता गुंतवणूकदारांनी मध्यम ते दीर्घकालीन गुंतवणुकीचा विचार करावा, असं तज्ज्ञांचं मत आहे.

आयपीओ तपशील

बजाज हाऊसिंग फायनान्सच्या तथा बीएचएफलच्या आयपीओसाठी दरपट्टा ६६ ते ७० रुपये प्रति शेअर असा होता. यात ५० टक्के शेअर पात्र संस्थात्मक खरेदीदारांसाठी (QIB), १५ टक्के बिगर संस्थात्मक गुंतवणूकदारांसाठी (NII) आणि ऑफरच्या किमान ३५ टक्के हिस्सा किरकोळ गुंतवणूकदारांसाठी राखून ठेवण्यात आले होते. रिटेल, संस्थात्मक आणि बिगर संस्थात्मक गुंतवणूकदारांच्या मानक आरक्षणाव्यतिरिक्त शेअरहोल्डर्ससाठी एक विशिष्ट कोटा राखून ठेवण्यात आला होता.

हेही वाचा: अदानी समूहाच्या शेअरमध्ये तेजी, हिंडेनबर्गच्या नव्या आरोपांना गुंतवणूकदारांचे प्रत्युत्तर

काय करते ही कंपनी?

बजाज हाऊसिंग फायनान्स ही कंपनी गृहकर्ज वितरणाच्या व्यवसायात आहे. ही नॉन डिपॉझिट हाऊसिंग वित्त पुरवठादार कंपनी आहे. आर्थिक वर्ष २०१८ पासून ही कंपनी तारण घेऊन कर्ज पुरवण्याचं काम करते. बजाज फायनान्स या बड्या कंपनीच्या पूर्ण मालकीची ही उपकंपनी आहे. बजाज फायनान्समध्ये बजाज फिनसर्व्हची ५१.३४ टक्के हिस्सेदारी आहे.

(डिस्क्लेमर : हे वृत्त केवळ माहितीपर आहे. हा कोणत्याही प्रकारचा गुंतवणुकीचा सल्ला नाही. शेअर बाजारातील गुंतवणुकीत जोखीम असते. गुंतवणूक करण्यापूर्वी आपल्या सल्लागाराचा सल्ला घ्या.)