Share Market News : अव्हॅक्स अपॅरल्स अँड ज्वेलर्स या एसएमई आयपीओनं शेअर बाजारात धडाकेबाज एन्ट्री केली आहे. जोरदार लिस्टिंगनंतरही भाव वधारल्यानं कंपनीच्या शेअरला अप्पर सर्किट लागलं आहे. त्यामुळं पहिल्याच दिवशी गुंतवणूकदारांचे पैसे दुप्पट झाले असून मकर संक्रांतीचा दिवस गोड झाला आहे.
बीएसई एसएमईवर अव्हॅक्स अपॅरल्स अँड ज्वेलर्स आयपीओची लिस्टिंग ९० टक्के प्रीमियमसह झाली. हा शेअर १३३ रुपयांच्या पातळीवर खुला झाला. तर ५ टक्क्यांच्या अप्पर सर्किटनंतर कंपनीच्या शेअर्सची किंमत १३९.६५ रुपयांवर पोहोचली आहे.
अव्हॅक्स अपॅरल्स अँड ज्वेलर्सचा आयपीओ किरकोळ गुंतवणूकदारांसाठी ७ जानेवारी रोजी खुला झाला. तो ९ जानेवारीपर्यंत खुला होता. कंपनीनं आयपीओसाठी प्रति शेअर ७० रुपये दर निश्चित केला होता. आयपीओचा एक लॉट २००० शेअर्सचा होता. त्यामुळं गुंतवणूकदारांना किमान १ लाख ४० हजार रुपयांची गुंतवणूक करावी लागली.
आयपीओच्या माध्यमातून १.९२ कोटी रुपये उभारण्याचं कंपनीचं उद्दिष्ट आहे. हा आयपीओ पूर्णपणे फ्रेश इश्यू होता. कंपनीनं आयपीओच्या माध्यमातून २.७४ लाख नवे शेअर्स जारी केले.
हा आयपीओ २६० पेक्षा जास्त पट सब्सक्राइब झाला होता. किरकोळ श्रेणीत हा आयपीओ सर्वाधिक ३७२ पट सब्सक्राइब झाला. त्याचवेळी एनआयआय श्रेणीत १४० पेक्षा जास्त पट सब्सक्राइब झाला.
अव्हॅक्स अपॅरल्स अँड ज्वेलर्स ही कंपनी दोन वेगवेगळ्या व्यवसायात आहे. कंपनी होलसेल ट्रेडिंगमध्ये आहे. त्याचबरोबर चांदीच्या दागिन्यांची ऑनलाइन विक्री देखील करते. ही कंपनी अंगठी, पैंजण, जेंट्स यांसारखे दागिने बनवते.
संबंधित बातम्या