कर्जाचा बोजा घटताच अनिल अंबानी फॉर्मात! रिलायन्स इन्फ्राचा शेअर उसळला, खरेदीसाठी गुंतवणूकदारांची झुंबड

रिलायन्स इन्फ्राच्या शेअरमध्ये गेल्या पाच दिवसांत ४० टक्के तर वर्षभरात ७० टक्क्यांनी वाढ झाली आहे. मात्र, दीर्घ मुदतीत त्यात झपाट्याने घसरण झाली असून ११ जानेवारी २००८ रोजी २४८५ रुपयांच्या किमतीवरून सध्याच्या किमतीपर्यंत हा शेअर ८७ टक्क्यांनी घसरला आहे.

तपशील काय आहे?

अनिल अंबानी यांच्या मालकीच्या रिलायन्स इन्फ्रास्ट्रक्चर लिमिटेडने आयुर्विमा महामंडळ (एलआयसी), आयसीआयसीआय बँक आणि इतर कर्जदारांची थकबाकी फेडल्यानंतर आपले स्वतंत्र कर्ज ८७ टक्क्यांनी कमी केले आहे. कंपनीवर सध्या ४७५ कोटी रुपयांचे कर्ज आहे. रिलायन्स इन्फ्रास्ट्रक्चरने बुधवारी सांगितले की, त्यांचे बाह्य कर्ज 3,831 कोटी रुपयांवरून 475 कोटी रुपयांवर आले आहे.

काय म्हणाली कंपनी?

त्यामुळे कंपनीची नेटवर्थ 9,041 कोटी रुपये आहे. रिलायन्स इन्फ्राने भारतीय आयुर्विमा महामंडळ, एडलवाइज अॅसेट रिकन्स्ट्रक्शन कंपनी लिमिटेड, आयसीआयसीआय बँक, युनियन बँक आणि इतर कर्जदारांची थकबाकी भरली आहे. भारतीय आयुर्विमा महामंडळाचे (एलआयसी) संपूर्ण थकित कर्ज फेडण्यासाठी ६०० कोटी रुपये भरले. याशिवाय रिलायन्स इन्फ्राने एडलवाइजकडे २३५ कोटी रुपयांचे आणखी एक दायित्व फेडले.

तसेच अदानी इलेक्ट्रिसिटी मुंबई लिमिटेड (एईएमएल) आणि अदानी एनर्जी सोल्युशन्स लिमिटेड (एईएसएल) (पूर्वीची अदानी ट्रान्समिशन लिमिटेड) यांच्याशी करार केले. यानंतर दोन्ही कंपन्यांनी एकमेकांवरील लवादाचे दावे मागे घेण्याचे मान्य केले आहे. रिलायन्स इन्फ्राने २०२२ मध्ये मुंबईतील वीज वितरण व्यवसाय अदानी ट्रान्समिशन लिमिटेडला विकण्याच्या व्यवहारासंदर्भात १३,४०० कोटी रुपयांचा लवाद दावा दाखल केला होता.

(एजन्सी इनपुटसह)