adani group stock : अदानी समूहातील 'या' कंपनीचा शेअर मोठी झेप घेणार; काय आहे कारण?

अदानी पॉवरनं सुमारे ५००० कोटी रुपयांच्या निधी उभारणीचा विचार सुरू केला आहे. या संदर्भातील प्रस्ताव मंजूर करण्यासाठी सोमवार, २८ ऑक्टोबर २०२४ रोजी संचालक मंडळाची बैठक घेण्यात येणार आहे. या बातमीची सकारात्मक पडसाद बाजारात उमटले आहेत. 

अदानी पॉवरच्या शेअरची ओपनिंग आज उत्साहवर्धक नव्हती. मात्र काही वेळातच हा शेअर एनएसईवर ६१२ रुपयांच्या उच्चांकी पातळीवर पोहोचला. त्यात सुमारे ४ टक्के वाढ झाली. सकाळी ११ वाजता तो ३.१७ टक्क्यांनी वधारून ६०६.३० रुपयांवर व्यवहार करत होता.

हेही वाचा: वारी एनर्जीजच्या आयपीओचं आज वाटप, तुम्हाला लागला की नाही कसं तपासणार? वाचा!

 टेक्निकल चार्टवर अदानी पॉवरच्या शेअरची किंमत नुकतीच ५८० रुपये प्रति शेअरच्या आसपास पोहोचली असून आता अल्प ते मध्यम कालावधीत ६६० ते ७२० रुपये प्रति शेअरपर्यंत पोहोचण्याची शक्यता तज्ज्ञांनी व्यक्त केली आहे.

एक्सपर्ट्स काय म्हणतात?

लक्ष्मी श्री इन्व्हेस्टमेंट अँड सिक्युरिटीजचे संशोधन प्रमुख अंशुल जैन यांनी 'मिंट'ला दिलेल्या माहितीनुसार, कंपनीच्या संचालक मंडळाची पुढील आठवड्यात सोमवारी बैठक होणार असून त्यामध्ये पाच हजार कोटी रुपयांचा निधी उभारण्याच्या प्रस्तावावर विचार करून त्याला मंजुरी देण्यात येणार आहे. यामुळं अदानी पॉवरची चर्चा आहे. शिवाय, चार्ट पॅटर्नवर हा शेअर सुमारे ५८० रुपये प्रति शेअरवर पोहोचला आहे. फंडामेंटल आणि टेक्निकल अशा दोन्ही दृष्टिकोनातून हा शेअर मजबूत दिसत आहे.

थोडा अधिक काळ शेअर्स ठेवण्याचा सल्ला अंशुल जैन यांनी दिला आहे. नजीकच्या काळात हा शेअर ६६० रुपयांपर्यंत, तर मध्यम कालावाधीत तो ७२० रुपयांपर्यंत जाण्याची अपेक्षा आहे, असं जैन म्हणाले.

हेही वाचा: लक्ष्य पॉवरटेकची शेअर मार्केटमध्ये जोरदार सलामी! पहिल्याच दिवशी गुंतवणूकदारांचे पैसे दुप्पट

चॉइस ब्रोकिंगचे कार्यकारी संचालक सुमीत बगरिया यांनी सांगितलं की, अदानी पॉवरचे भागधारक ६५० रुपये प्रति शेअर या अल्पमुदतीच्या उद्दिष्टासाठी ५७० रुपयांचा स्टॉप लॉस कायम ठेवून हा शेअर ठेवू शकतात. नवीन गुंतवणूकदार ५७० रुपयांचा स्टॉप लॉस कायम ठेवून ६५० रुपयांच्या अल्पमुदतीच्या टार्गेटवर शेअर्स खरेदी करू शकतात.

(डिस्क्लेमर: हे वृत्त केवळ माहितीपर आहे. हा कोणत्याही प्रकारच्या गुंतवणुकीचा सल्ला नाही. शेअर बाजारातील गुंतवणुकीत जोखीम असते. त्यामुळं गुंतवणूक करण्याआधी आर्थिक सल्लागाराशी चर्चा करा.)