Sanju Samson: संघ निवडताना राजकारण? संजू सॅमसन सोशल मीडियावर ट्रेंड, चाहत्यांचा BCCI वर संताप

टी-२० विश्वचषकासाठी टीम इंडियाची घोषणा करण्यात आली आहे. आशिया चषकात अत्यंत खराब कामगिरी केलेली असताना देखील यष्टिरक्षक फलंदाज ऋषभ पंतची संघात निवड करण्यात आली आहे. त्याचवेळी, संजू सॅमसनला T20 WC संघात स्थान मिळालेले नाही. त्यामुळे भारतीय क्रिकेट चाहत्यांमध्ये संतापाची लाट उसळली आहे.

आशिया चषकात ऋषभ पंतची कामगिरी अत्यंत खराब राहिली आहे. त्यामुळे टी-२० विश्वचषकात संजू सॅमसनला सामील करण्याची मागणी होत होती. पण तसे झाले नाही. त्यामुळे संघाची घोषणा झाल्यानंतर चाहत्यांची निराशा झाली. आता चाहते सोशल मीडियावर या गोष्टीचा राग काढत आहेत. या दोन्ही खेळाडूंचे आकडे शेअर करत चाहते BCCI वर संताप व्यक्त करत आहेत.

सोबतच, पंत हा आशिया चषकातील पाकिस्तान आणि श्रीलंकेविरुद्धच्या महत्त्वाच्या सामन्यांमध्ये फ्लॉप ठरला. त्यावेळीही संजू सोशल मीडियावर ट्विटरवर ट्रेंड करत होता. तशीच परिस्थिती वर्ल्डकपसाठी संघाची घोषणा झाल्यानंतरही आहे. संजू सॅमसन ट्विटरवर ट्रेंड करत आहे.

दोन्ही खेळाडूंची आकडेवारी

ऋषभ पंतने आतापर्यंत ५७ टी-20 आंतरराष्ट्रीय सामने खेळले आहेत. यात त्याने अवघ्या २३.४३ च्या सरासरीने आणि १२६.२४ च्या स्ट्राइक रेटने ९१४ धावा केल्या आहेत. त्याचबरोबर संजू सॅमसनने आतापर्यंत केवळ १६ टी-20 आंतरराष्ट्रीय सामने खेळले आहेत. त्याने २१.१४ च्या सरासरीने आणि १३५ च्या स्ट्राईक रेटने २९६ धावा केल्या आहेत. संजू सॅमसनला ऋषभ पंत इतक्या संधी मिळालेल्या नाहीत. याचाही राग चाहत्यांच्या मनात आहे.

दोघांना मिळालेली संधी आणि आकडेवारी पाहिल्यानंतर संजू सॅमसन हा T20 क्रिकेटमध्ये एक चांगला पर्याय आहे. तर पंत हा कसोटी आणि एकदिवसीय क्रिकेटमध्ये चांगला खेळाडू आहे.